«Ніхто не жадае падарожнічаць у Беларусь». На фестывалі ў Берне не будзе беларускай праграмы

Беларуская праграма на міжнародным фэстывалі Fernweh-2021 у швейцарскім Берне адмененая.

На такі крок амбасада Беларусі ў Швейцарыі пайшла пасля скасавання дамовы з боку гатэлю, дзе мусіла адбывацца канцэртная праграма і месціцца выстава, паведамляе «Свабода».

Прычынай насцярожанасці з боку швейцарскіх арганізатараў стаў шэраг публікацый на беларускую тэму ў некалькіх мясцовых выданнях. Аўтары матэрыялаў асудзілі арганізатараў і ў такой падкрэслена апалітычнай праграме імпрэзы пабачылі здзек з ахвяраў рэжыму.

У каментары для артыкула, што выйшаў у tagesanzeiger.ch, прэзідэнт швейцарскага прадстаўніцтва міжнароднай праваабарончай арганізацыі LiberecoЛарс Бюнгер адзначыў: «Сёння ніхто не адчувае жадання падарожнічаць у Беларусь».

Міжнародны фестываль культураў Fernweh пройдзе ў Берне 29–31 кастрычніка пад слоганам «Вакол свету за тры дні».