Невідушчая спявачка з Беларусі скарыла журы конкурсу «Голас»
23-гадовая беларуска Патрысія Курганава возьме ўдзел у прэстыжным расійскім музычным конкурсе.
Новы сезон шоў «Голас» стартуе на «Першым канале» ужо восенню. Зараз у тэлевізійным цэнтры «Астанкіна» у разгары кастынгі ў праект, на якіх часам з'яўляюцца самыя нечаканыя ўдзельнікі. Але нароўні з фрыкамі і клоўнамі паказаць свае здольнасці прыходзяць і сапраўдныя таленты: некаторыя з іх да слёз кранаюць прадзюсараў праекта. Больш за ўсіх уразіла журы 23-гадовая дзяўчына, якая прыехала ў Маскву з Беларусі — Патрысія Курганава. Патрысія ад нараджэння не бачыць, а яе гісторыя выклікала ў многіх слёзы на вачах.
Як аказалася, Патрысія перажыла сапраўдную трагедыю — яна страціла родную маму, якая не дачакалася аперацыі на хворым сэрцы, і брата — ён загінуў у страшнай аварыі. Сем гадоў таму, у інтэрнаце для людзей са слабым зрокам у Мінску дзяўчыну адшукала спявачка Дзіяна Гурцкая.
Гурцкая тады прыехала да дзетак, каб праспяваць для іх, і была здзіўленая выступам адной з выхаванак інтэрната, якая выканала яе ўласную песню «Ты тут». Гурцкая вырашыла ўзяць Патрысію пад сваю апеку і дапамагчы ёй развіць вакальны талент.
Патрысія ўжо брала ўдзел у фестывалі «Белы кій» і запісала дуэт з выпускніком «Фабрыкі зорак» Маркам Цішманам — з ім дзяўчына па-сапраўднаму пасябравала. Марк суправаджаў Патрысію і на кастынг у «Голас».
Калі Курганава праспявала знакамітую «I will always love you» Уітні Х'юстан, а следам за ёй песню Паліны Гагарынай «Калыханка», журы аднагалосна вырашыла прапусціць дзяўчыну ў наступны тур кастынгу.
«У мяне трэсліся каленкі, я так хвалявалася! — прызналася дзяўчына. — Калі прамовілі маё імя, узрадавалася так, што пачала скакаць. У мяне спыталі, каго б я хацела выбраць сабе ў настаўнікі на праекце. Я сказала, што выбіраю Пелагею ці Аляксандра Градскага, яны мне блізкія па духу».