N.R.M. запісаў новы альбом
Новы альбом «N.R.M.» атрымаў назву «Д.П.Б.Ч.». Гурт прэзентуе яго ў наступным месяцы, а першае канцэртнае выкананне адбудзецца 13 верасня на легендарным фестывалі «Рок па вакацыях».
Альбом «Д.П.Б.Ч.» будзе складацца з 8 песень, сярод іх тры былі прэзентаваны раней: «Ty Maŭčyš – Ja Maŭču» ― у падтрымку Аўтарадыё ў 2011-м годзе, «Pramień» ― разам з кліпам ў 2012-м годзе, а «Kuźnička» ― пры падачы заяўкі на «Еўрабачанне–2012». Запісаў N.R.M. альбом утрох, спяваюць Піт Паўлаў і Алезіс Дземідовіч. Вокладку намаляваў вядомы беларускі мастак і дызайнер Уладзімер Цэслер. Праца над альбомам праходзіла ў Беларусі цягам некалькіх апошніх гадоў.
У падтрымку альбома рыхтуюцца два кліпы. Кліп на альбомную песню «Pramień» гурт прэзентаваў у лютым мінулага года.
Кажа лідар гурту Піт Паўлаў:
— Альбом цалкам вытрыманы ў стылістыцы і духу вядомага ўсім «N.R.M.». І ўсе старыя і новыя прыхільнікі не расчаруюцца, паслухаўшы новую працу гурта. Пасля прэзентацыі «Д.П.Б.Ч.» у МІнску гурт збіраецца ў гастрольны тур па гарадах Беларусі, Расіі і Польшчы.
Каб адчуць смак і настрой новага альбома «N.R.M.», «Арт Сядзіба» прэзентуе песню «Д.П.Б.Ч.», якая і дала яму назву.
13 верасня у мінскім клубе «Цэнтр» пройдзе фестываль «Рок па вакацыях — 2013». Штогадовы фестываль беларускай музыкі ў гэтым годзе адсвяткуе сваё 20-годдзе. У юбілейным канцэрце прымуць удзел ветэраны беларускага рока і адносна маладыя гурты. Менавіта на гэтым фестывалі адбудзецца першая прэзентацыя новага альбома N.R.M.
