Пачалося галасаванне па вызначэнні пераможцы прэміі Ultra-Music Awards 2012
Пачалося галасаванне, паводле вынікаў якога вызначацца пераможцы прэміі Ultra-Music Awards (http://ultra-music.com/uma#jury). Кампетэнтнае
журы ў складзе 57 чалавек — журналістаў, музыкантаў, арганізатараў канцэртаў — выбірае пераможцаў у шасці асноўных намінацыях: "Гурт года", "Альбом
года", "Песня года", "Кліп года", "Падзея года" і "Адкрыццё года".
Як паведаміў БелаПАН заснавальнік прэміі і галоўны рэдактар рэсурсу Ultra-Music.com Вячаслаў Радзівонаў, галасаванне журы праводзіцца ўпершыню — раней пераможцаў ва ўсіх намінацыях вызначалі інтэрнэт-карыстальнікі. "Галасаванне "акадэмікаў" пачалося 1 студзеня і будзе доўжыцца да 14 студзеня. Пасля гэтага мы падлічым вынікі і ў канцы студзеня назавем па тры прэтэндэнты на перамогу ў кожнай намінацыі", — сказаў Радзівонаў. Пераможцы Ultra-Music Awards будуць аб'яўлены 22 лютага на цырымоніі ўзнагароджання ў мінскім клубе "Цэнтр".
У 2012 годзе беларускія музыканты запісалі 114 альбомаў у розных жанрах. "З асцярожным аптымізмам я б назваў мінулы год рэнесансам беларускай непапсовай музыкі: эстрадныя артысты нічым
асабліва памятным пра сябе не заявілі — гэта тычыцца і канцэртных праграм, і выпушчаных кружэлак, на якія ў іх 2012-ы наогул быў чамусьці скупы, — адзначае член журы
журналіст Алег Клімаў. — Такіх ужо суперяркіх новых імёнаў высакосны год нам не падарыў, аднак моладзь рэалізоўвала сябе хто як можа, гэта і клубныя мерапрыемствы, і рэлізы. Але
і "народныя" непапсовыя артысты без сваёй творчасці нас не пакінулі. Асабіста мне цяжка даваўся выбар у намінацыі "Адкрыццё года".
1 студзеня таксама стартавала галасаванне ў намінацыі "Ultra-хіт". За права атрымаць гэтую прэмію змагаюцца гурты, чые песні былі прызнаны найлепшымі ў штомесячным чарце
на сайце Ultra-Music.com на працягу мінулага года. Галасаванне будзе доўжыцца да 31 студзеня.
Прэмія ў галіне сучаснай актуальнай беларускай музыкі Ultra-Music Awards заснавана музычным парталам Ultra-Music.com у 2009 годзе. Яе пераможцамі
станавіліся "Ляпіс Трубяцкой", "Троіца", The Toobes, Akute, The Blackmail і іншыя гурты.