pARTisan: Генерацыя нуль?
25 жніўня ў прасторы Studio67 (Партызанскі пр., 2) у 19.00 адбудзецца прэзентацыя новага нумара pARTisan, прысвечанага маладым мастакам і мастачкам, чыя творчасць выбухнула ў апошняе дзесяцігоддзе.
«Можна з упэўненасьцю сказаць, што ў Менску пачынае зьяўляцца аўдыторыя, і мастак становіцца публічнай фігурай, аб’ектам увагі ня толькі замоўцаў або прафэсіяналаў, але й максымальна шырокага й адначасова хоць бы мінімальна падрыхтаванага гледача». Наталля Гарачая
Героямі і тэмамі гэтага нумара сталі:
Алеся Жыткевіч, Андрэй Лазуткін, Аляксей Навумчык, Антон Сарокін, Юля Цімафеева; а таксама Анро, BAZINATO, Уладзімір Грамовіч, Аляксей Талстоў, Яўген Шадко, Аліна Швядкова, Юра Шуст і ўдзельнікі праекта BY NOW — Аляксандр Веледзімовіч, Сяргей Гудзілін, Яўген Канаплёў-Лейдзік, Міхаіл Лешчанка, Андрэй Лянкевіч, Аляксандра Салдатава, Вольга Сасноўская, Максім Шумілін. Асобныя артыкулы прысвечаны выставам «XXY» і «Больш за яго».
Аўтары нумара: Вольга Бубіч, Адам Глобус, дэбютавалі: Аляксей Барысёнак і Вольга Сасноўская, Антон Барысенка, Наталля Гарачая, Марына Рахлей, Дар’я Трайдэн, Марыя Яшчанка.
І мы радыя прэзентаваць упершыню на беларуская мове артыкул Барыса Гройса «Палітыка інсталяцыі»!
«У дадзены момант я — нулявы ўзровень беларускай ідэнтычнасьці».
Аляксандр Веледзімовіч, беларускі фатограф, адзін з фіналістаў праекта «BY NOW»
Акрамя знаёмства з аўтарамі і героямі нумара, мультымедыйнай прэзентацыі праектаў Антона Сарокіна і Аляксея Навумчыка і паэтычнага выступу Юлі Цімафеевай, падчас прэзентацыі адбудзецца невялікая дыскусія, прысвечаная адметнасці мастацтва новай хвалі.
- Чым адметнае новае мастацтва? Якія тэмы і медыя абіраюць маладыя творцы?
- Ці магчыма казаць пра пераемнасць альбо гэта генерацыя, якая гадавалася ў «татальным нулі»?
Гасцямі дыскусіі выступяць: крытык і куратарка Галерэі сучаснага мастацтва «Ў» Аксана Жгіроўская, мастак Міхаіл Гулін, філосаф, кіраўніца канцэнтрацыі «Сучаснае грамадства, этыка і палітыка» (ECLAB) Вольга Шпарага.
На вокладцы альманаха: Жанна Гладко. З праекта «Inciting Force».
Выказваем падзяку прасторы Studio67 за дапамогу ў арганізацыі імпрэзы.
Уваход вольны!