Пінск страціў чарговы аб’ект старажытнай забудовы
Будынак канца ХІХ стагоддзя знаходзіўся ў гістарычным цэнтры Пінска. Напачатку года ў ім пачаліся рамонтныя працы, у выніку якіх абрынуліся муры, цяпер яго зусім ліквідавалі.
Мясцовыя ўлады паведамляюць, што аб’ект будзе адноўлены, і, магчыма, нават з выкарыстаннем старажытнай цэглы.
Па словах краязнаўцы Эдварда Злобіна, у сучасным Пінску такое не ўпершыню:
— Гэта ж вядомая гісторыя, калі, мякка кажучы, прадстаўнікі органаў гарадской улады настойвалі на зносе двух дамоў: адзін быў на Завальнай, другі — на Першамайскай. Настойліва прасілі знесці, хоць сэнсу ніякага не было, і нібыта яны абавязкова іх адновяць. Так, дом, які быў на Першамайскай, перанеслі на супрацьлеглы бок. Так, ён стаіць, але гэта навабуд, ніякай каштоўнасці ён не ўяўляе.
Краязнаўца дадае, што амаль кожны год Пінск губляе свае гісторыка-архітэктурныя адметнасці, якія няхай не маштабныя, але захоўваюць каларыт мінуўшчыны. Так, летась у горадзе над Пінай знішчылі будынак турмы ХІХ стагоддзя.
Фота: media-polesye.by