«Shaman Jungle» прэзентаваў альбом «Amazing» (фота, відэа)
У мінскім паб-клубе «Бруге» 11 сакавіка гурт «Shaman Jungle» прэзентаваў свой трэці альбом «Amazing».
Канцэрт распачаўся інструментальным сэтам ад сябра гурта, гітарыста Андрэя Апановіча. Наведвальнікі былі вельмі кантактныя. Складалася адчуванне, што шмат хто ў залі ведае адно аднаго і музыкаў. Апошнія, у сваю чаргу, гулялі па танцполе замест таго, каб медытаваць у грымёрцы да пачатку канцэрту і ў перапынку, як я чакала, арыентуючыся на назву гурта.
«Музыка павінна дыхаць» — казаў са сцэны бубнач «Shaman Jungle». І распавёў, як гурт запісаў альбом «Amazing», пасяліўшыся на хутары. І паабяцаў, што хутка будзе відэа з бэкстэйджу стварэння альбома. А пакуль што ў сеціве можна паглядзець кліп на песню «Nagavor».
Галоўную ролю ў ім выканала вакалістка і клавішніца «Shaman Jungle», што ў такім жа, як і ў кліпе, амплуа і выступала ў «Бруге». Сцэнічныя касцюмы гурта адсылаюць кудысьці на Усход і ў той жа час да нейкага кшталту фэнтэзі-этна. Дарэчы, стыль сваёй музыкі «Shaman Jungle» вызначае як heavy ethno-fusion і world music. Каб патлумачыць, што яны граюць тым, хто іх ніколі не чуў, я б сказала «падобна да расейскіх «Theodor Bastard». І не ў мяне адной такія асацыяцыі.
Але «Shaman Jungle» усё ж тутэйшы, беларускі, гурт. І няхай у іх пакуль што толькі адна беларускамоўная песня і ніводнага інструмента, які б асацыяваўся з беларускай традыцыйнай культурай, штосьці мне падказвае: усё наперадзе.
На канцэрце песню «Nagavor» пераасэнсавалі дзяўчаты з этнастудыі «Кетры», паказаўшы перфоманс з усходнімі танцамі, але ў кашульках з моднымі цяпер вышыванымі матывамі.
«Shaman Jungle» разам з Андрэем Апановічам плануюць наступны сумесны канцэрт 23 сакавіка ў мінскім бары «Графіці».
