Слухай думкі папярэднікаў! Пагаджайся альбо спрачайся з імі! Цытуй сваё!

Праект “Цытуй сваё!” заклікае беларусаў згадаць найлепшае з беларускай думкі.



Да ўдзелу ў ім запрашаюцца ўсе ахвочыя. Каб трапіць у годны фан-клуб айчыннага мыслення, трэба проста даслаць улюбёныя цытаты беларускіх аўтараў на адрас cytuj.svajo@gmail.com. Праект разлічаны на два месяцы.
Штотыдзень працэс калектыўнага складання актуальнай анталогіі айчыннай думкі будуць каментаваць выбітныя асобы беларускай культурнай прасторы. Такім чынам да супольнай працы далучацца не толькі чытачы культурных тэкстаў, але і іх стваральнікі. 
“Адна з асаблівасцяў культуры – яе пераемнасць. Мы пераймаем, назапашваем альбо забываем, дадаем сваё і перадаем увесь гэты набытак тым, хто ідзе за намі.
Апошнім часам, аднак, мы сталі нацыяй склеротыкаў, быццам цалкам забыўшыся на тое, што было перад намі. Часцяком мы нанова спрабуем адказаць на тыя самыя пытанні, нягегла фармулюем нанова бліскуча сфармуляванае да нас, паўтараем тыя самыя памылкі і вынаходзім ужо вынайдзенае.
Мы цытуем каго заўгодна, толькі не тых, хто нарадзіўся і жыў на нашай зямлі, дыхаў тым самым паветрам, быў часцінкай нашай гісторыі, а значыць, і нас саміх. Кожная трапна і ёміста выказаная думка – наш супольны нематэрыяльны скарб, цагліна ў тым, што мы сёння называем беларускай культурай, яшчэ не да канца ўсведамляючы яе архітэктуру і вонкавыя межы.
Не так важна, на якой мове былі выказаныя думкі, з якіх паўстаў наш Беларускі Дом. Важна тое, ці спрыялі яны яго паўстанню, ці тлумачылі на свойскі лад жыццё і свет белы.
Слухай думкі папярэднікаў! Пагаджайся альбо спрачайся з імі!
Цытуй сваё!”
Міхаіл Анемпадыстаў, budzma.by