Супрацоўнікі Нацыянальнай бібліятэкі Беларусі сталі мадэлямі Mark Formelle
21 лютага Mark Formelle прэзентаваў лімітаваную калекцыю шкарпэтак #МоваГэтаСтылёва. Такі падарунак для беларусаў брэнд падрыхтаваў да Міжнароднага дня роднай мовы, які сёння адзначаецца ў 20-ы раз. Першымі з калекцыяй пазнаёміліся супрацоўнікі Нацыянальнай бібліятэкі Беларусі.
Міжнародны дзень роднай мовы, абвешчаны ЮНЕСКА, першы раз адзначылі ў 2000 годзе. Спецыяльна да юбілею такога свята Mark Formelle выпусціў калекцыю шкарпэтак #МоваГэтаСтылёва і паказаў у ёй тыя асаблівасці беларускай мовы, якія ўсе жыхары нашай краіны ведаюць яшчэ са школы: «Жы» і «Шы», «Дж» і «Дз», «Ў» і «I».
— Сёння яркія і незвычайныя шкарпэткі носяць амаль усе: і айцішнікі, і офісныя работнікі, і прадстаўнікі творчых прафесій. Гэты элемент гардэроба дазваляе «вылучыцца з натоўпу» і быць стыльным ў любым вобразе, — распавядае Наталля Суворава, кіраўнік аддзела маркетынгу брэнда Mark Formelle. — Мы выпусцілі калекцыю #МоваГэтаСтылёва спецыяльна для тых беларусаў, якія любяць і модную вопратку, і родную мову, незалежна ад таго, размаўляюць на ёй у паўсядзённым жыцці ці не.
Здымка лукбука калекцыі прайшла ў нестандартным для моднага адзення фармаце. Замест арт-прастор і подыумаў — чытальныя залы Нацыянальнай бібліятэкі Беларусі. А на месцы прафесійных мадэлей — супрацоўнікі галоўнай бібліятэкі краіны.
— Мы заўсёды шукаем новыя і неардынарныя шляхі папулярызацыі роднай мовы, таму з задавальненнем прынялі ўдзел у праекце #МоваГэтаСтылёва, — распавядае начальнік сацыякультурнага цэнтра Нацыянальнай бібліятэкі Беларусі Радміла Букач. — У бібліятэцы можна пазнаёміцца з дакументамі, якія дазваляюць прасачыць развіццё беларускай мовы, таму што ў нашых фондах захоўваюцца 10 выпускаў Бібліі Францыска Скарыны, датаваныя 1517-1519 гадамі, рукапіс сатырычнай «Прамовы Мялешкі» XVII ст., адзінае прыжыццёвае выданне Максіма Багдановіча «Вянок» з аўтографам аўтара і найноўшыя кнігі нашых сучаснікаў.
Шкарпэткі з калекцыі #МоваГэтаСтылёва ўжо можна знайсці ў фірмовых крамах Mark Formelle. Але ўсім жадаючым варта паспяшацца, паколькі калекцыя лімітаваная — усяго 1 пара на кожныя 700 беларусаў.
Паводле прэс-рэліза