«Толькі джаз», ніякай папсы: новы трэк ад K3TYVANA

Музычны праект K3TYVANA прэзентуе трэк «Толькі джаз», які быў створаны ў межах конкурса «Заспявай 4Х4».

Малады ды амбіцыйны гурт K3TYVANA запісаў песню «Толькі джаз» на верш паэткі Дашы Бялькевіч. Трэк створаны ў стылях 2-step, UK Garage і Deep. Песня распавядае пра сітуацыю ў стасунках, калі лёгкае і несур'ёзнае стаўленне аднаго чалавека да іншага прыносіць боль і пакуты. Для кагосьці каханне — гульня, а для кагосьці — цэлы сусвет.

«Мы вырашылі зрабіць твор у модным і стылёвым кірунку, бо хочацца каб беларуская мова гучала крута і смачна, а галоўнае, каб яна была нормай, а ня рэдкасцю», — кажа вакалістка гурта Кэцівана Асраташвілі.


K3TYVANA — беларускі гурт, створаны ў 2014 годзе ў Мінску. Музыка прадстаўляе сабой незвычайны мікс з розных жанраў: 2-step, deep, electro-pop, house, funk і jazz. Мова песень — англійская, беларуская і руская. Гурт складаецца з вакалісткі Кэціваны Асраташвілі, кампазітара і дыджэя Sasha Plus і клавішніка Васіля Мельнічка.

Песня «Толькі джаз» прайшла ў фінал конкурса «Заспявай 4Х4» і змагаецца за перамогу і прызы: здымкі кліпу і грашовую ўзнагароду ў 1000 рублёў.


Бліжэйшы выступ гурта K3TYVANA адбудзецца 15 верасня ў клубе «Брюгге»: каманда выступіць на разагрэве ўкраінскай спявачкі DaKooka.

Сачыць за навінамі гурта можна праз:
«Укантакце», Soundcloud, Facebook, Youtube.
Паводле прэс-рэліза