У Мінску адбудзецца Першы фестываль інтэлектуальнай кнігі

Установа культуры «Кніжны офіс» 27 — 31 траўня ў культурніцкай прасторы ОК16 ладзіць Першы фестываль інтэлектуальнай кнігі "Прадмова".  

Фестываль інтэлектуальнай кнігі «Прадмова» — гэта крытычны агляд зробленага на беларускім кніжным рынку за апошнія гады і спроба адшукаць адказы на пытанні: куды мы мусім рушыць далей? ці мае будучыню беларуская інтэлектуальная кніга? у якіх традыцыях і варунках мы знаходзім сябе зараз?
Фестываль — гэта пляцоўка для інтэнсіўнай камунікацыі паміж усімі ўдзельнікамі кнігавыдавецкага працэсу: выдаўцамі і аўтарамі, рэдактарамі і крытыкамі, ілюстратарамі і дызайнерамі, перакладчыкамі і безумоўна чытачамі, зацікаўленымі ў сучаснай і якаснай беларускай інтэлектуальнай кнізе. На выставе вы зможаце ўбачыць прадукцыю выдавецтваў: ARCHE, «Галіяфы», «Зміцер Колас», «Кнігазбор», «Лимариус», «Логвінаў», «Тэхналогія», «Экономпресс», «Янушкевіч» і інш.

Падчас фестывалю адбудуцца дыскусіі і круглыя сталы, майстар-класы і прэзентацыі новых кніг беларускіх выдавецтваў, мастацкія чытанні і выступы-перформансы актораў, сустрэчы з цікавымі асобамі, пераможцамі і сябрамі журы літаратурных прэмій, і шмат якія іншыя літаратурныя і калялітаратурныя імпрэзы, прысвечаныя беларускай інтэлектуальнай кнізе. Асобна варта адзначыць таксама Дзіцячы фармат: шэраг забаўляльных мерапрыемстваў і прэзентацый для дзяцей і дыскусіі-абмеркаванні для іх бацькоў, датычныя будучыні беларускай дзіцячай кнігі.

Сярод удзельнікаў фестывалю: В. Акудовіч, У. Арлоў, А. Бахарэвіч, Л. Баршчэўскі, С. Дубавец, І. Дубянецкая, П. Касцюкевіч, М. Мартысевіч, У. Мацкевіч, Б. Пятровіч, А. Упала, А. Хадановіч, Ю. Цімафеева, В. Шпарага і многія інш.
Калі вы прадстаўнік выдавецтва альбо арганізацыі, датычнай да кніжнай справы, і жадаеце прыняць удзел у фармаце выставы-продажу з уласным стэндам і інфармацыяй пра вашу дзейнасць ці прадукцыю — рэгіструйцеся тут.  

Калі вы маеце цікавыя ідэі мерапрыемстваў для фестывальнай праграмы – персанальна ці ад імя арганізацыі – для рэгістрацыі заяўкі запоўніце адмысловую форму.
  Заяўкі на Фестываль і выставу прымаюцца да 14 траўня.

Найбольш цікавыя і важныя з заяўленых мерапрыемстваў стануць часткай праграмы Першага беларускага фестывалю інтэлектуальнай кнігі «Прадмова».

Уваход для гасцей – вольны!

Больш інфармацыі пра фестываль у сацыяльных сетках: Facebook ці Vkontakte