Выйшла новая кніга Алега Грушэцкага. Гэта фэнтэзі на аснове беларускага фальклору
У выдавецтве «Чатыры чвэрці» выйшла кніга «Рыцар Янка і каралеўна Мілана. Таямнічае каралеўства» — фэнтэзі па-беларуску на аснове беларускага фальклору. Аўтар — Алег Грушэцкі. Героі рамана — міфічныя персанажы з беларускай міфалогіі: Цмок, волат Вярнігара, вужалкі, гарцукі, ваўкалакі, багнік, лясун…
Юныя
брат і сястра прыязджаюць на летнія вакацыі ў вёску і выпадкова знаходзяць у
дзедавай каморы партал, праз які трапляюць у таямнічае каралеўства, што нагадвае беларускае Сярэднявечча, дзе ёсць рыцары, Цмок, міфічныя істоты з
беларускіх паданняў. Згодна са старажытнай легендай, юнакам належыць выратаваць
каралеўства ад злога караля-чараўніка, які падманам і падступствам захапіў трон.
Юнакоў
чакаюць неверагодныя прыгоды, рыцарскія бітвы, барацьба за волю і вызваленне
краю ад ненавісных чорных ваўкалаў. Але прыгоды і бітвы, пераадоленне сваіх
страхаў і перашкод на працягу казкі са звычайных хлопчыка і дзяўчынкі гартуюць
сапраўдных герояў.
Кніга разлічаная на дзяцей сярэдняга школьнага ўзросту і стане выдатным падарункам дзіцяці, каб цікава і з карысцю правесці час на школьных летніх вакацыях. Аформіў выданне таленавіты мастак Віктар Козел («Краіна Вымярэнія»). Набыць кнігу «Рыцар Янка і каралеўна Мілана. Таямнічае каралеўства» можна ў кнігарні «Акадэмічная кніга» альбо замовіць на Biblio.by і Oz.by. Таксама можна пытаць твор у бібліятэках.
Азнаёміцца
з фрагментам кнігі можна тут.
Пра
аўтара:
Аўтар кнігі — Алег Грушэцкі. Бацька траіх дзяцей, журналіст, публіцыст, літаратар. Піша вершы, казкі і фэнтэзі на беларускай мове. Лаўрэат шэрагу творчых прэмій. У мінулым — адзін з арганізатараў скаўцкага руху на Беларусі. Удзельнік гісторыка-культурнага таварыства «Талака», першага беларускамоўнага летніка «Грунвальд», нашчадак старажытнага шляхецкага роду. Супрацоўнічае з «Новым Часам».
