Беларускі Банк развіцця ўкладзе $101 млн у мадэрнізацыю Зімбабвэ

Банк развіцця Рэспублікі Беларусь укладзе больш за $100 млн у мадэрнізацыю горназдабыўной і сельскагаспадарчай галін Зімбабвэ, паведамляе «Еўрарадыё».

Дамоўленасці былі дасягнуты падчас восеньскага візіту ў афрыканскую краіну старшыні праўлення БР Андрэя Жышкевіча.

Банк развіцця запускае праграму механізацыі сельскай гаспадаркі Зімбабвэ коштам 51 мільён долараў. Створана спецыяльнае прадпрыемства па навучанні мясцовых жыхароў зборцы, эксплуатацыі і абслугоўванню беларускай сельскагаспадарчай тэхнікі.

«У выніку ўзаемадзеяння з нашымі калегамі з панафрыканскага банка Eastern and Southern African Trade and Development Bank (TDB) у Зімбабвэ прафінансаваныя пастаўкі больш як 350 трактароў МТЗ, 120 сеялак Лідаграпраммаш, 20 камбайнаў Гомсельмаш, а таксама грузавой тэхнікі МАЗ», — адзначыў Андрэй Жышкевіч.

Таксама — для развіцця горназдабыўнога сектара Зімбабвэ — будзе пастаўлена спецыялізаванае абсталяванне на суму $50 млн. Па словах Жышкевіча, Беларусь безумоўна гатовая даць новае абсталяванне для здабычы карысных выкапняў.

У 2018 годзе паміж Банкам развіцця і TDB было заключана пагадненне аб адкрыцці панафрыканскаму банку крэдытнай лініі на суму 70 мільёнаў долараў для фінансавання паставак беларускай тэхнікі ў краіны Афрыкі.