За Сталіна і рускую мову. Кандыдаты ад «русского мира»: хто яны?

Этап вылучэння кандыдатаў у дэпутаты яшчэ не завершаны, але ўжо цяпер сярод удзельнікаў парламенцкай кампаніі можна заўважыць шэраг сілаў з відавочна прарасійскай пазіцыяй. Belsat.eu разбіраўся, хто гэтыя людзі, і ці варта чакаць актывізацыі прарасійскіх сілаў падчас выбараў у Палату прадстаўнікоў?

mirsalimava2_9jfqo.jpg


nn.by

Балатавацца ў дэпутаты Палаты прадстаўнікоў будуць прынамсі двое прадстаўнікоў прарасійскага руху «Грамадзянская згода»: Эльвіра Мірсалімава і Арцём Агафонаў. У сваёй праграме рух выступае за падтрыманне курсу на будаўніцтва Саюзнай дзяржавы, абарону правоў «рускамоўнай большасці» і абяцае змагацца супраць «русафобіі», якую лічаць «самай распаўсюджанай і небяспечнай праяваю ксенафобіі» ў Беларусі.

l_ktouw_xiy_490x432.jpg

Эльвіра Мірсалімава. Фота: vk.com
«Калі не я, то хто? Хто будзе прадстаўляць парламент нашай Рэспублікі? Якія-небудзь нацыяналісткі-папулісткі, што прасоўваюць пад выглядам «заходніх каштоўнасцяў» вычварэнствы і ювенальнае бязмежжа? Апраўдацелі каўказскіх тэрарыстаў? Русафобы, праціўнікі праваслаўя і адэпты апалячвання?»тлумачыць Мірсалімава, чаму яна ідзе на выбары.
Мірсалімава падкрэсліла, што будзе вылучацца на выбарах ад Рэспубліканскай партыі працы і справядлівасці, чальцом якой з’яўляецца. Мірсалімава яшчэ не стала кандыдаткай у дэпутаты, але ўжо адзначылася шэрагам скандальных заяваў. Напрыклад, яна заклікала паставіць у Беларусі помнік Сталіну.
«Сталін – вялікі дзеяч нашай агульнай гісторыі. Куды вялікая велічыня, чым уся гэтая польска-літоўская шляхецкасць, якую нас сёння абавязваюць прымаць як нібыта беларускіх дзеячаў», – заявіла яна ў інтэрвʼю soglasie.by.
Мірсалімава кажа, што нацыянальная ідэя беларусаў у тым, што яны – рускія. А таксама падтрымлівае дзейную ўладу: сцвярджае, што беларусы ніколі так добра не жылі, як у часы кіравання Лукашэнкі.

Арцём Агафонаў. Фота: facebook.com/artem.agafonov

Арцём Агафонаў. Фота: facebook.com/artem.agafonov

Арцём Агафонаў зарэгістраваў сваю ініцыятыўную групу ў Асіповічах. З 2005 па 2014 год ён быў актывістам Аб’яднанай грамадзянскай партыі, аднак пасля Майдану сышоў праз сваю прарасійскую пазіцыю. Цяпер Агафонаў – актыўны абаронца рускай мовы ў Беларусі, выступае супраць з’яўлення шыльдаў на беларускай мове. Паводле яго, краіна знаходзіцца «на парозе фундаментальных палітычных пераўтварэнняў» і таму ў парламент мусяць ісці «адказныя людзі».
Дырэктар па даследаваннях «East Center», палітолаг Андрэй Елісееў адзначаў у сваім акаўнце ў «Facebook», што ўдзельнікаў парламенцкай кампаніі ад «Грамадзянскай згоды» правільна было б лічыць не прарасійскай, а антыбеларускай сілай, бо яны фактычна выступаюць за падрыў суверэнітэту Беларусі.
«Грамадзянская згода» падтрымлівае шчыльныя стасункі з Рэспубліканскай партыяй працы і справядлівасці (РППС). Партыя таксама выступае супраць «беларусізацыі» і падтрымлівае саюз з Расіяй.
«Расеюшка падымаецца з каленяў. І нам з ёй па шляху», – заявіў сёлета ў праграмным інтэрв’ю кіраўнік віцебскай партыйнай арганізацыі Аляксандр Лукашок. 

Агафонаў і Лукашок. Фота: facebook.com/stropov

Агафонаў і Лукашок. Фота: facebook.com/stropov

Агулам па Беларусі зарэгістравана 10 ініцыятыўных групаў сябраў РППС, у тым ліку 5 – у Мінску. Акрамя таго партыя можа вылучыць сваіх кандыдатаў на з’ездзе. Колькі іх будзе – пакуль невядома.
Адзначым, што на мінулых выбарах у Палату прадстаўнікоў трапілі тры сябра РППС.
У адрозненні ад РППС, Беларуская патрыятычная партыя яшчэ летам абвесціла, што збіраецца вылучаць на выбарах не менш за 90 кандыдатаў у дэпутаты. Імаверна, большасць з іх будуць вылучаць праз з’езд, бо зарэгістравана толькі 2 ініцыятыўныя групы сябраў БПП.
Лідар партыі – Мікалай Улаховіч, які таксама ўзначальвае грамадскае аб’яднанне «Беларускае казацтва». БПП падтрымлівае будаўніцтва Саюзнай дзяржавы з Расіяй.
«Мы з’яўляемся прадстаўнікамі мільёнаў рускамоўных, людзей з рускімі каранямі», – заявіў Улаховіч сёлета агенцтву БелаПАН.
Пры гэтым афіцыйна Улаховіч выступае супраць ідэалогіі «рускага свету», сваю ідэалогію называе «патрыятызмам», а героям гэтай ідэалогіі лічыць Лукашэнку.
Як і РППС, БПП на мінулых выбарах атрымала тры дэпутацкіх мандата – у тым ліку ў парламент трапіў сам Улаховіч. Ці будзе Улаховіч сёлета вылучаць сваю кандыдатуру ў дэпутаты – невядома.
Прыярэтыт інтэграцыі па постсавецкай прасторы замацаваны і ў статуце Камуністычнай партыі Беларусі. КПБ сёлета вылучае ў дэпутаты 60 чалавек. Пры гэтым КПБ з’яўляецца лідарам па колькасці зарэгістраваных ініцыятыўных групаў па збору подпісаў – іх 28 па ўсёй Беларусі.
Між тым няма падставаў казаць пра актывізацыю прарасійскіх сілаў падчас сёлетніх выбараў у Палату прадстаўнікоў. Па сутнасці, за выключэннем прадстаўнікоў «Грамадзянскай згоды», сярод удзельнікаў кампаніі пакуль не бачна людзей, якія б выкарыстоўвалі адкрыта антыбеларускую рыторыку.
Палітолаг Алесь Лагвінец не лічыць, што ўплыў прарасійскіх сілаў падчас гэтай парламенцкай кампаніі можа ўзмацніцца.
«Парламенцкая кампанія цалкам не заўважная для грамадства і няма падставаў думаць, што яна нешта істотна зменіць ў краіне», – адзначыў ён у каментары belsat.eu.
belsat.eu

Чытайце таксама:

Топ–7 апазіцыянераў, якія сталі прыхільнікамі «рускага свету»