Кіраўнік МЗС Нямеччыны заявіў аб рызыцы грамадзянскай вайны ў М'янме

Пасля путчу ў М'янме ваенная хунта прывяла краіну на мяжу катастрофы, папярэдзіў Хайка Мас. Міністр заклікаў усе зацікаўленыя бакі аказаць ціск на путчыстаў.

Міністр замежных спраў ФРГ Хайка Мас папярэдзіў пра небяспеку грамадзянскай вайны ў М'янме. «Ніхто ў рэгіёне не можа быць зацікаўлены ў тым, каб М'янма пагрузілася ў грамадзянскую вайну, у тым ліку тыя, каму няма справы да выратавання дэмакратыі», — адзначыў ён у інтэрв'ю выданням групы Funke, апублікаваным у нядзелю, 4 красавіка.
Кіраўнік МЗС ФРГ раскрытыкаваў дзеянні ваеннай хунты ў М'янме. «За некалькі тыдняў ваенныя прывялі М'янму на мяжу катастрофы. Больш за 500 чалавек забітыя, тысячы знаходзяцца ва ўцёках», — канстатаваў Мас. Міністр заклікаў усе зацікаўленыя бакі аказаць ціск на путчыстаў, каб яны пагадзіліся на перамовы ў рамках Асацыяцыі дзяржаў Паўднёва-Усходняй Азіі (АСЕАН).
Ваенныя захапілі ўладу ў М'янме ў ноч на 1 лютага, абвясціўшы аб увядзенні надзвычайнага становішча тэрмінам на адзін год. Уплывовыя прадстаўнікі ўзброеных сілаў незадоўга да путчу заявілі аб фальсіфікацыі вынікаў парламенцкіх выбараў у лістападзе 2020 года. Лідар Нацыянальнай лігі за дэмакратыю і лаўрэат Нобелеўскай прэміі міру Аун Сан Су Чжы, якая перамагла на выбарах, і шэраг іншых палітыкаў былі арыштаваныя.
З таго часу ў рэспубліцы не спыняюцца масавыя пратэсты супраць путчыстаў, якія жорстка душацца. 1 красавіка Савет бяспекі ААН асудзіў гвалт у дачыненні да мірных дэманстрантаў у М'янме. Паводле апошніх звестак, у ходзе падаўлення пратэстаў супраць путчу ў краіне забіта як найменш 550 чалавек, з якіх 46 - дзеці.
dw.com