Мадура адклаў рэферэндум аб сваёй адстаўцы з-за «недахопу часу»

Прэзідэнт Венесуэлы Нікалас Мадура абвясціў, што рэферэндум аб яго адстаўцы, які спрабуе арганізаваць апазіцыя, не пройдзе ў гэтым годзе. На арганізацыю рэферэндуму «няма часу», патлумачыў венесуэльскі лідэр.

«Калі яны выканаюць усе патрабаванні, рэферэндум аб адстаўцы адбудзецца ў наступным годзе, кропка», — заявіў Мадура.

У пятніцу Нацыянальны выбарчы савет Венесуэлы абвясціў несапраўднымі больш за 600 тысяч подпісаў, сабраных за правядзенне ўсеагульнага рэферэндуму аб адстаўцы венесуэльскага прэзідэнта. Апазіцыя ў адказ абвінаваціла Савет у тым, што ён абараняе інтарэсы ўрада Мадура і спрабуе запаволіць правядзенне рэферэндуму, перадае ВВС.

Час правядзення галасавання грае ключавую ролю для абодвух бакоў. Калі рэферэндум будзе арганізаваны да 10 студзеня 2017 года і Мадура прайграе, будуць арганізаваныя новыя выбары.

Калі галасаванне будзе праведзена пазней і Мадура прайграе, яго месца да канца прэзідэнцкага тэрміну ў студзені 2019 года будзе займаць віцэ-прэзідэнт.

Петыцыя была перададзена уладам 2 мая. Апазіцыя заяўляе, што яна сабрала подпісы 1,85 млн выбаршчыкаў, якія падтрымліваюць правядзенне рэферэндуму. Гэта значна больш, чым патрабуе заканадаўства.

Па дадзеных Савета, подпісаў было больш — 1,97 млн.

Выбарчы савет таксама пастанавіў, што за 1,3 млн чалавек, чые подпісы не былі адхіленыя, павінны прыйсці ў мясцовыя выбарчыя ўчасткі, каб пацвердзіць сваю асобу. На гэта ў выбаршчыкаў будзе ўсяго пяць дзён.

Венесуэла перажывае цяжкі эканамічны крызіс. У краіне назіраецца недахоп імпартных прадуктаў, у тым ліку лекаў і ежы. Прычынай стала зніжэнне коштаў на нафту і ў цэлым неэфектыўная мадэль эканомікі. Краіна апынулася залежнай ад імпарту прадуктаў харчавання, якія яна купляла за даходы ад продажу нафты, якія, у сваю чаргу, імкліва скараціліся.