На «Міс Сусвет» ад Лаоса паедзе прыгажуня з беларускімі каранямі. Яе мама з Лельчыц

Пераможцай конкурсу «Міс Сусвет Лаос 2020» стала прыгажуня з беларускімі каранямі Крысціна Ласасіма. Аб гэтым паведамляецца ў прэс-рэлізе на афіцыйным сайце мерапрыемства.

Перамога ў конкурсе краіны, які праводзіўся віртуальна, цяпер дае дзяўчыне права прадставіць Лаос на міжнародным узроўні — «Міс Сусвет 2020», які павінен адбыцца 16 траўня ў горадзе Халівуд амерыканскага штата Фларыда.

Для даведкі: гэтыя мерапрыемствы планавалася правесці ў 2020 годзе, аднак праз пандэмію каронавіруса яны былі перанесеныя на 2021-ы.

Як паведамляюць лаоскія СМІ, Крысціна Ласасіма нарадзілася ў сталіцы краіны В'енцьяне, але мае беларускія карані. У прыватнасці, яе мама пераехала сюды з Лельчыц Гомельскай вобласці.

Таксама вядома, што дзяўчына ўжо не ў першы раз становіцца пераможцай конкурсаў прыгажосці: у свой час яна атрымала тытул «Міс Лаос 2012». Затым працавала мадэллю ў Тайландзе.

Паводле «Беларусь і свет».