Польшча не спраўляецца з бяспекай у кіберпрасторы
Праца дзяржустановаў у гэтай галіне хаатычная, назіраецца адсутнасць сістэмнай канцэпцыі.
Бяспека ў кіберпрасторы ў Польшчы забяспечваецца слаба і няправільна — піша ў сваім рапарце Вышэйшая кантрольная палата Польшчы. Паводле яе, дагэтуль не прадпрынятыя крокі ў сферы маніторынгу і супрацьдзеяння пагрозам у інтэрнэце.
Актыўнасць дзяржавы паралізуе найперш адсутнасць аднаго цэнтру прыняцця рашэнняў, які б каардынаваў працу грамадскіх устаноў, і пасіўнае чаканне рашэння, якое ў гэтай сферы запрапануе ЕС.
Кантрольная палата сцвердзіла, што праца дзяржустановаў, звязаная з кібербяспекай, праводзілася хаатычна і без агульнай сістэмнай канцэпцыі.
Кантроль таксама выявіў, што дзяржаўная адміністрацыя не мае ведаў аб памеры і відах кіберзлачынстваў. Вызначаны ў заканадаўстве спосаб збору і захоўвання такой інфармацыі аказаўся неэфэктыўным.