Прадстаўніцтва Беларусі ў Жэневе папракнула УВКПЧ ААН у адсутнасці рэакцыі на заявы польскага дэзерціра

Пастаяннае прадстаўніцтва Беларусі пры міжнародных арганізацыях у Жэневе пракаментавала ўчарашнюю заяву УВКПЧ ААН.


У каментары дыпламатычнай місіі ў папрок УВКПЧ ААН ставіцца адсутнасць рэакцыі на апавяданні збеглага польскага жаўнера Эміля Чачко аб расстрэлах мігрантаў на мяжы. Акрамя таго, у сталым прадстаўніцтве незадаволеныя тым, што структура ААН не адлюстравала ў сваім дакуменце выкарыстанне вадамётаў польскім бокам пры падзеях на пераходзе Кузніца-Брузгі. Пры гэтым дыпламаты замаўчалі пра тое, што мігранты спрабавалі сілай прарвацца ў Польшчу, разбіралі загароды і г. д, зазначае REFORM.by.

«Беларускі бок глыбока шкадуе, што эксперты УВКПЧ, тым не менш, не пракаментавалі кадры выкарыстання памежнікамі і арміяй Рэспублікі Польшчы вадамётаў, спецсродкаў і іншага гвалту ў дачыненні да бяззбройных замежнікаў, сярод якіх няўзброеным вокам прыкметная прысутнасць дзяцей і жанчын. Таксама выклікае занепакоенасць факт адсутнасці рэакцыі УВКПЧ на заявы польскіх грамадзян аб сістэмных расстрэлах уцекачоў, а таксама аб расправах з прадстаўнікамі польскіх НДА, якія спрабавалі аказаць садзейнічанне ўцекачам» — гаворыцца ў паведамленні прадстаўніцтва.

У ім таксама вітаецца частка дакумента УВКПЧ з рэкамендацыямі і патрабаваннямі ў адрас Еўрасаюза і яго членаў.

Пастаяннае прадстаўніцтва цалкам адмаўляе прэтэнзіі, выказаныя УВКПЧ беларускаму боку. У прыватнасці дыпламаты настойваюць на тым, што расказам мігрантаў пра гвалт з боку беларускіх памежнікаў нельга верыць.

«Апытаныя супрацоўнікамі УВКПЧ замежнікі, якія нібыта трапілі на польскую тэрыторыю з Беларусі, з'яўляюцца гасцямі ў выключна ўразлівым і вельмі залежным становішчы ад іх гаспадароў. У такой сітуацыі, а таксама ва ўмовах поўнай ананімнасці і немагчымасці якой-небудзь дзейснай праверкі дакладнасці абвінавачванняў у адрас беларускіх памежнікаў выкладаемыя УВКПЧ сцвярджэнні не могуць выклікаць ніякага даверу ні ў аднаго разважнага чалавека» — лічаць у пастаянным прадстаўніцтве.

Пры гэтым пастаяннае прадстаўніцтва «не заўважыла» учорашнія словы афіцыйнай прадстаўніцы Упраўлення Вярхоўнага камісара ААН па правах чалавека Элізабет Тросел, якая паведаміла, што ААН не мае даных пра «масавыя пахаванні мігрантаў» на мяжы Польшчы і Беларусі, пра якія казаў той самы збеглы польскі жаўнер.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: