Удзельніцы Pussy Riot «на сутках» абвясцілі галадоўку

Удзельніцы Pussy Riot Люся Штэйн і Марыя Алёхіна, адпраўленыя пад адміністрацыйны арышт «за прапаганду нацысцкай сімволікі» і выяву Лукашэнкі, абвясцілі галадоўку.

Муніцыпальны дэпутат Басманнага раёна Люся Штэйн і ўдзельніца Pussy Riot Марыя Алёхіна абвясцілі галадоўку ў спецпрыёмніку ў Сахарава, дзе яны адбываюць адміністрацыйны арышт. Пра гэта паведамілі «Медузе» ўдзельнікі Pussy Riot.

Штэйн і Алёхіна патрабуюць, каб іх змясцілі ў адну камеру. Цяпер у спецпрыёмніку, як адзначаюць удзельніцы Pussy Riot, разам з імі ўтрымліваюцца чатыры жанчыны. Пры гэтым Штэйн і Алёхіна знаходзяцца ў розных камерах, адна з якіх разлічаная на 10 чалавек, другая — на 13 чалавек.

Прагулкі дазваляюць ім толькі ў розны час, а за спробу перапісвацца пагражаюць адміністрацыйнай справай па артыкуле КААП пра невыкананне законнага патрабаванні супрацоўніка паліцыі.

Ніякіх прававых падстаў для таго, каб ізаляваць іх адна ад адной, няма, падкрэсліваюць Алёхіна і Штэйн.

Марыю Алёхіну і Люсю Штэйн адправілі пад адміністрацыйны арышт 17 снежня, прызнаўшы вінаватымі паводле артыкула аб прапагандзе нацысцкай сімволікі. Штэйн павінна будзе правесці пад арыштам 14 сутак, Алёхіна — 15 сутак.

Па словах Алёхінай, яе абвінавацілі ў прапагандзе нацысцкай сімволікі з-за фатаграфіі, якую яна апублікавала ў Instagram у 2015 годзе. На здымку намаляваныя свастыкі і Аляксандр Лукашэнка. У сваю чаргу, на Штэйн склалі пратакол з-за яе партрэта з фуражкай СС, які яна апублікавала ў 2018 годзе. Штэйн патлумачыла, што гаворка ідзе пра «фан-арту і фоташоп».