Украіна. Забярыце сцяг у героя

Украіна збіраецца святкаваць пятую гадавіну Еўрамайдана, адным з герояў якой быў Міхаіл Гаўрылюк, вядомы ў прэсе як «казак Гаўрылюк».

Падчас акцый пратэсту на Еўрамайдане яго на марозе дагала распранулі прадстаўнікі «Беркута». Казус з Гаўрылюком меў гучны рэзананс. 

Пасля змены рэжыму яго абралі дэпутатам, а яго подзвіг натхніў аўтара помніка, што паставілі ў Барыспалі ў гонар загінулых на Майдане. У цэнтры кампазіцыі — выява Гаўрылюка, які змагаецца з чорнай драпежнай птушкай. 

З тых часоў вобраз казака моцна змяніўся. Яго абвінавацілі ў крадзяжы гуманітарнай дапамогі, галасаванні за павышэнне коштаў, збіцці журналіста наўпрост у будынку парламента. 

Напэўна таму цяпер запатрабавалі прыбраць з помніка выяву дэпутата. Асноўных аргументаў два. Па-першае, Гаўрылюк не мае ніякага дачынення да «Нябеснай сотні». Па-другое, ён выяўлены голым з ледзь прыхінутым сцягам Украіны ніжэй за пояс. 

«Сцяг Украіны на такім месцы?! Гэты помнік — здзек!» — пішуць на форумах. 

Сам Гаўрылюк кажа, што не мае ніякага дачынення да канцэпцыі мемарыялу, аднак пры гэтым выступае супраць дэканструкцыі скандальнага помніка.

Паводле ўкраінскай прэсы