Вікінг у пахавальнай ладдзі: у Нарвегіі знойдзена чарговае незвычайнае пахаванне

У нарвежскім горадзе Трондхейм наўпрост на рынкавай плошчы выяўлена пахаванне вікінга. Здавалася б, нічога дзіўнага: на радзіме суворых воінаў, мараплаўцаў і гандляроў рыбай пастаянна знаходзяць і больш незвычайныя пахаванні. Аднак у цяперашняй знаходкі ёсць адна асаблівасць: упершыню археолагі выявілі ў гэтым рэгіёне пахавальную ладдзю.

Навукоўцы з Нарвежскага інстытута даследаванняў культурнай спадчыны паведамляюць пра тое, што, на жаль, драўніна, з якой была зроблена ладдзя, не захавалася. Аднак яны знайшлі ў пахаванні кавалкі іржы і цвікі, а форма адкладанняў выразна паказвае на тое, што тут некалі была пахавана менавіта лодка. Даўжыня ладдзі складала як мінімум чатыры метры. Лодка была арыентавана па восі поўнач-поўдзень.
У ёй знойдзена толькі дзве доўгіх косці — верагодна, усё, што засталося ад шкілета вікінга. Па словах археолага Яна Рыда (Ian Reed), стан парэшткаў дазволіць правесці ДНК-тэсты, якія пацвердзяць або аспрэчаць прыналежнасць касцей чалавеку. Хоць самі навукоўцы не сумняваюцца, што гэта менавіта чалавечыя рэшткі.
Сярод артэфактаў, знойдзеных у тым жа пахаванні, быў невялікі кавалак ліставай бронзы, частка лыжкі і ключа, мабыць, ад скрыні. Усе знаходкі папярэдне датаваныя 7-10 стагоддзямі. Навукоўцы мяркуюць, што магіла была выкапана адразу па форме лодкі, а сама ладдзя служыла труной для вікінга. Над пахаваннем калісьці, хутчэй за ўсё, узвышаўся курган.

Спецыяліст па лодках ранніх вікінгаў Кнут Паске (Knut Paasche) распавядае, што, мяркуючы па форме, ладдзя была выраблена ў мястэчку пад назвай Аф'ёрд (Åfjord). Уласна, сёння Трондхейм з'яўляецца адміністрацыйным цэнтрам правінцыі, у якой і размешчана камуна Аф'ёрд.
«Гэта тып лодкі з адносна плоскім ніжнім узроўнем і невялікі уляганнем, — распавядае Пааше. — Такія лодкі прызначаліся для мелкаводдзя, напрыклад, каб пераплысці раку Нідэльвен».
Паводле яго слоў, падобныя «лодачныя магілы» існавалі ўжо ў жалезным веку і былі распаўсюджаныя затым у ранніх вікінгаў. Аднак у Трондхейме гэта першая падобная знаходка такога роду, і знаходка «адсоўвае» гісторыю горада на некалькі стагоддзяў таму.
Справа ў тым, што афіцыйная дата заснавання Трондхейма — 977 год (дарэчы, першапачаткова менавіта ён і быў сталіцай Нарвегіі), але цяпер з'явіўся яшчэ адзін доказ на карысць таго, што горад існаваў задоўга да гэтага часу. Па словах гісторыкаў, у летапісе горада да гэтага часу застаецца мноства прабелаў — у асноўным з-за пажару 1861, які практычна цалкам знішчыў горад і, адпаведна, шматлікія дакументы і артэфакты.
Паводле vesti.ru