Забойчая ініцыяцыя ў ПАР
У Паўднёва-Афрыканскай Рэспубліцы пасля традыцыйнай цырымоніі пасвячэння ў мужчыны памерлі 26 хлопчыкаў.
У Паўднёва-Афрыканскай Рэспубліцы пасля традыцыйнай цырымоніі ініцыяцыі памерлі 26 хлопчыкаў, яшчэ 104 шпіталізаваныя з-за абязводжвання, гангрэны, інфікавання пасля абразання і іншых траўмаў.
Сем чалавек ужо арыштаваныя за ўтрыманне нелегальных школ ініцыяцыі. Міністэрства краіны па справах традыцыйных абшчын заявіла, што неабходна пакласці канец гэтай практыцы.
Падобныя заявы рабіліся і ў мінулым годзе, калі стала вядома пра гібель 27 хлопчыкаў. Тады скончыць з «недапушчальным звычаем» абяцаў асабіста прэзідэнт Джэйкаб Зума.
Цырымоніі ініцыяцыі ў Паўднёвай Афрыцы, як правіла, доўжацца тры тыдні. У іх удзельнічаюць дзясяткі тысяч хлопчыкаў. Акрамя абразання яны ўключаюць тэсты на выжыванне, у прыватнасці выпрабаванне холадам.
Як паведамляе паліцыя, большасць смяротных выпадкаў адбываецца ў афіцыйных месцах прысвячэння, дзе, па правілах, павінны знаходзіцца лекары, гатовыя прыйсці на дапамогу хлопчыкам.