БелАЭС выйшла са строю праз два дні пасля запуску?
У панядзелак раніцай у сеціве з'явілася інфармацыя аб тым, што ў нядзелю першы блок Беларускай АЭС перастаў выпрацоўваць магутнасць, турбіна спыненая з-за выхаду са строю трансфарматараў напружання. На працягу ўсяго панядзелка TUT.BY чакаў афіцыйнага каментара ад БелАЭС.
Фота: прэс-служба кампаніі
— Прычына спынення — выбухі некалькіх трансфарматараў напружання (яны прызначаны для змены напружання ў сілавых электрычных ланцугах) на адным з агрэгатаў, звязаных з генератарам. Фармальна нічога экстраардынарнага не адбылося, аналагічнае здарэнне адбывалася на Ленінградскай АЭС, але расследаванне, аднаўленне схемы выдачы магутнасці і паўторная наладка зойме шмат часу, — напісала крыніца.
Паводле яе інфармацыі, да вытворцы трансфарматараў будуць гарантыйныя прэтэнзіі. Але ў бліжэйшы час станцыя энергію выпрацоўваць не будзе. Эксперты кажуць, што на бяспеку рэактара з пункту гледжання ўцечкі радыяцыі такі інцыдэнт уплыву не аказвае.
У канцы дня ў Мінэнерга паведамілі, што на першым энергаблоку Беларускай АЭС працягваецца этап «Энергетычны пуск». «Дадзены этап прадугледжвае рэжымы працы энергаблока на розных узроўнях магутнасці (да 500 МВт), а таксама праверку ўстойлівасці працы энергасістэмы пры неаднаразовым яе паніжэнні».
— У ходзе выпрабаванняў, якія праводзяцца, у адпаведнасці з праграмай дадзенага этапу, выяўлена неабходнасць замены асобнага электратэхнічнага вымяральнага абсталявання. Работы па замене дадзенага абсталявання ажыццяўляюцца згодна з тэхналагічным рэгламентам. У цяперашні час на энергаблоку праводзяцца выпрабаванні і працы ў адпаведнасці з этапнай праграмай. Усе тэхналагічныя сістэмы функцыянуюць у штатным рэжыме, — гаворыцца ў паведамленні.
Нагадаем, у мінулую суботу Аляксандр Лукашэнка адкрыў БелАЭС у Астраўцы, даўшы дазвол на ўздым электрычнай магутнасці энергаблока да 400 МВт у адпаведнасці з этапнай праграмай. «Гістарычны момант: краіна становіцца ядзернай дзяржавай», — заявіў ён.
Гэта значыць, у суботу рэактар першага энергаблока працаваў на магутнасці 40%. У адпаведнасці з праграмамі выпрабаванняў магутнасць энергаблока павінна паэтапна падвышацца да праектнай — 1190 МВт. Увод у прамысловую эксплуатацыю першага энергаблока плануецца ў першым квартале 2021 года.