Больш за 172 тоны прадуктаў. У Расіі затрымалі найбуйнейшую партыю «санкцыёнкі» з Беларусі

Найбуйнейшую партыю санкцыйнай прадукцыі затрымалі бранскія мытнікі на мяжы РФ і Беларусі.

Як паведамілі ў Федэральнай мытнай службе Расіі, у васьмі фурах было выяўлена больш за 172 тон яблыкаў, груш і памела. Пры праверцы кіроўцы не змаглі падаць неабходныя для перавозкі дакументы, пішуць naviny.online.

«Этыкеткі на скрынях указвалі на паходжанне садавіны з краін, уключаных у санкцыйны спіс. Супрацоўнікамі Бранскай мытні распачата сем спраў аб адміністрацыйных правапарушэннях», — паведамілі ў ФМС, дадаўшы, што фура з памела, вырабленым у КНР, перададзена Рассельгаснагляду для далейшай праверкі.

Раней Федэральная служба па ветэрынарным і фітасанітарным наглядзе заяўляла, што практычна ўся санкцыйная прадукцыя трапляла ў РФ з тэрыторыі Беларусі.