Эканаміст: Двухзначнай інфляцыі пакуль чакаць не выпадае

Што адбываецца з цэнамі і інфляцыяй? Пагаварылі з эканамістам Львом Марголіным.

Якой будзе інфляцыя ў Беларусі? Ілюстрацыйная выява

Якой будзе інфляцыя ў Беларусі? Ілюстрацыйная выява


У красавіку цэны выраслі на 0,4% (у сакавіку гэты паказчыку складаў 0,6%), а гадавая інфляцыя склала 4,7%, паведамляе Белстат. 
У красавіку 2023 года больш за ўсё выраслі цэны на харчовыя тавары — на 0,6% (за год — на 6,1%). З пачатку года прадукты падаражэлі на 3,6%, нехарчовыя тавары — на 1%, а паслугі — на 4,4%. 
Тэлеграм-канал «Нашы грошы» адзначае, што пры адсутнасці новых шокаў у бліжэйшыя месяцы можна ўбачыць далейшае, але невялікае зніжэнне тэмпаў росту цэн. А вось у другой палове года інфляцыя можа змяніць курс.
Эканаміст Леў Марголін кажа, што пытанне пра інфляцыю і кошты — пытанне даверу і адчування людзей.
— Ці растуць кошты, за кошт чаго, ці расце імпарт, ці знойдзены больш выгадныя лагістычныя маршруты, каб кампенсаваць страты 2022 года. У любым выпадку куранят па восені лічаць. Вельмі многае залежыць ад Расіі: рост беларускага экспарту ў РФ адразу на 22% за першы квартал сведчыць пра тое, што беларуская прадукцыя ў РФ стала досыць запатрабаванай. Але ці ўстойлівая гэта тэндэнцыя, — задаецца рытарычным пытаннем эканаміст.
Восень пакажа, наколькі беларуская эканоміка стала ўразлівай да інфляцыі.
— У нас цэны вельмі моцна залежаць ад вынікаў сельскагаспадарчага года. Часта здараецца так, што вырабленая сёлета сельскагаспадарчая прадукцыя становіцца намнога даражэйшай, чым у папярэдні год, — тлумачыць Леў Марголін.
Аднак інфляцыйная дынаміка дазваляе спадзявацца, што сёлета двухзначная інфляцыя эканоміцы пакуль не пагражае.
— Двухзначнай інфляцыі чакаць не даводзіцца. Нацыянальны банк, насуперак чаканням многіх, не стаў накачваць эканоміку пустымі грашыма, ды і са стаўкай рэфінансавання абыходзіцца досыць асцярожна. Эканамічныя ўлады трохі навучыліся на сваіх памылках, — кажа Леў Марголін. — І ўвогуле двухзначная інфляцыя звычайна з’яўляецца адказам на знешнія шокі і вынікам няўмелай эканамічнай палітыкі. З другім фактарам пакуль удаецца спраўляцца. Канечне, пры ўмове, што не адбудзецца нічога надзвычайнага.