Індэкс Міжнароднай канфедэрацыі прафсаюзаў: Беларусь у дзясятцы найгоршых
Беларусь знаходзіцца ў дзясятцы найгоршых краін для працоўных, сведчыць 11-ы глабальны індэкс па выкананні правоў, складзены Міжнароднай канфедэрацыяй прафсаюзаў, піша «Позірк».
Акрамя Беларусі ў гэтым пераліку фігуруюць Бангладэш, Гватэмала, Егіпет, М’янма, Туніс, Турцыя, Філіпіны, Эквадор і Эсваціні.
Метадалогія складання індэкса грунтуецца на “на стандартах асноўных правоў у сферы працы — права на свабоду аб’яднання, на вядзенне калектыўных перамоў, на забастоўку”. Аўтары дакумента абапіраюцца на вынікі анкетавання 340 нацыянальных прафсаюзаў у 169 краінах. Звесткі ацэньваюць даследчыкі ў галіне права, якія аналізуюць нацыянальнае заканадаўства і выяўляюць раздзелы, што не забяспечваюць належнай абароны міжнародна прызнаных калектыўных працоўных правоў.
Беларусь аднесеная да пятай катэгорыі з шасці — да краін, дзе выкананне правоў працоўных не гарантуецца.
У індэксе адзначана, што працоўныя ў Беларусі сутыкаюцца з сістэматычнымі рэпрэсіямі, неабгрунтаванымі затрыманнямі, адвольным закрыццём прафаюзаў.
“З красавіка 2022 года беларускія ўлады ўзмацнілі рэпрэсіі ў дачыненні да незалежных прафсаюзаў: запалохванне, арышты і змяшчэнне пад вартай лідараў і членаў прафсаюзаў, гвалтоўнае закрыццё, вобшукі ў офісах і канфіскацыя маёмасці, — гаворыцца ў дакуменце. — 42 лідары і актывісты прафсаюзаў незаконна затрымалі або пасадзілі ў турму, многія іншыя пазбаўленыя сваіх правоў і свабод. Тых, хто выходзіць на волю, улады называюць “экстрэмістамі”, робяць ізгоямі”.
Згодна з індэксам, “шакуючая дэградацыя правоў прафсаюзаў, грамадзянскіх і палітычных свабод заахвоціла Міжнародную канферэнцыю працы прыняць рэзалюцыю паводле арт. 33 Статута МАП, каб дабіцца ад уладаў выканання рэкамендацый Камісіі па расследаванні МАП”.
Глядзіце таксама
Затрыманні нелаяльных да ўладаў працоўных, падкрэсліваецца ў дакуменце, фіксаваліся на працягу ўсяго 2023 года і ў 2024-м. Палітвязні, у ліку якіх прафсаюзныя дзеячы, “утрымліваюцца ў бесчалавечных умовах”.
18–19 красавіка 2022 года па Беларусі пракацілася хваля вобшукаў і затрыманняў актывістаў незалежнага прафсаюзнага руху. Многія прафсаюзныя лідары былі асуджаныя ў крымінальным парадку (некаторыя ўжо паспелі выйсці на волю). Беларускі кангрэс незалежных прафсаюзаў і ўсе арганізацыі, якія ў яго ўваходзілі, ліквідаваныя.
Глядзіце таксама
