Ліквідуецца кампанія, якая валодае рознічнай сеткай «Любімая аптэка»

Кампанія «Фармін» стала чарговым гульцом, які сёлета пакідае фармацэўтычны рынак Беларусі. Працэс закрыцця аптова-рознічнага фармацэўтычнага бізнесу, які калісьці ўваходзіў у першую васьмёрку на рынку, стартаваў у канцы лістапада, піша Officelife.media.

5c4579863d529138b3407059896d901a.jpg

У мінулым месяцы быў выстаўлены на продаж галаўны офіс кампаніі на мінскім праспекце Незалежнасці.

Паводле інфармацыі крыніц на рынку, прычынай праблем бізнесу, які з сярэдзіны 1990-х развівае прадпрымальнік Інакенцій Ясноўскі, сталі даўгі перад пастаўшчыкамі і крэдыторамі. У прыватнасці, не так даўно прэтэнзіі да кампаніі «Фармін» у расійскім судзе прад'явіў вытворца зубной пасты «Splat».

Акрамя самога «Фарміна» цяпер ліквідуюцца некаторыя яго даччыныя структуры, якія займаліся развіццём рознічнай сеткі «Любімая аптэка». На піку ў яе ўваходзілі больш за 100 гандлёвых кропак. Паводле наяўнай інфармацыі, на ліквідацыю падалі «Партнер Медзітэк» і «Кампавід». Кампаніі «Не Ска» і «Фітабел», а таксама рэзідэнт ПВТ «Айціфарма» пакуль значацца як дзейсныя.

У гэтым годзе страціла самастойнасць кампанія «Белфарм». Яе склады і аптэкі сталі часткай «Вострава здароўя».