Тавараў будзе менш, яны будуць горшай якасці і даражэйшыя

Кожны дзень да іпэшніка могуць прыйсці і даказваць яму: ты няправільна заплаціў нейкія выдаткі. А гэта значна страшней, чым павышэнне падатку з 16 да 20 працэнтаў, тым больш што праз год абяцаюць наогул 25.

Беларускія ўлады прыкладаюць усе намаганні для таго, каб займацца малым бізнесам людзям было нявыгадна.

Бізнесовец разважае пра падатковую палітыку беларускіх улад у адносінах да ІП.

Для індывідуальных прадпрымальнікаў збіраюцца падняць падаходны падатак з 16 да 20%. Гэта прадугледжана праектам змяненняў у Падатковы кодэкс, паведамляюць у парламенце. 7 снежня дэпутаты зацвердзілі законапраект у першым чытанні.

Акрамя таго, з Падатковага кодэкса хочуць выключыць некаторыя віды дзейнасці, па якіх ІП могуць працаваць на адзіным падатку. Таксама прадугледжана карэкціроўка ставак адзінага падатку для індывідуальных прадпрымальнікаў у 1,5–3 разы, а для самазанятага насельніцтва — у 1,5–2,5 разы.

Да якіх наступстваў прывядзе павышэнне падаходнага падатку для ІП, «Філін» абмеркаваў з Аляксандрам Кныровічам.


— Дзяржава спрабуе ўсяляк выціснуць прадпрымальнікаў з такой формы дзейнасці, як ІП, гэта значыць яна свядома заяўляе: «Хлопцы, вам там не жыць. ІП мы пакідаем толькі для вельмі вузкага кола людзей».

Адпаведна, улады прыкладаюць усе намаганні для таго, каб займацца малым бізнесам было нявыгадна. Абмежаванне прымянення спрошчанай сістэмы падаткаабкладання — самы галоўны вынік гэтых намаганняў. Плюс павелічэнне падаткаў, больш строгія патрабаванні і гэтак далей.

І вось гэтыя 16–20 працэнтаў — гэта маленькая кропля да такога сур'ёзнага патоку ціску на іпэшнікаў. Па вялікім рахунку, для прадпрымальніка няма розніцы паміж 16 і 20 працэнтамі, таму што ён або плаціць падаткі, або не.

Сама сістэма падаткаабкладання, пры якой ты павінен даказваць свае выдаткі загадзя, дрэнная нават не з пункту гледжання памеру падаткаў: можа быць, пад 6% спрошчанай было б і больш падаткаў, але спрошчаная была добрая тым, што табе не трэба было даказваць нікому свае выдаткі. Паказаў абарот — заплаціў 6 працэнтаў, і ўсё, ніхто да цябе не прыйдзе і не спытае, а ці правільна ты выдаткаваў нейкія грошы.

Гэтая ж сістэма пры выплаце падаходнага падатку мае на ўвазе, што кожны дзень да іпэшніка могуць прыйсці і даказваць яму, што ён няправільна заплаціў нейкія выдаткі, а гэта страшней, чым павышэнне падатку з 16 да 20 працэнтаў, тым больш што праз год абяцаюць наогул 25.

Таму гэтыя дзеянні — гэта проста маленькі крок да таго, што ў прынцыпе спрабуюць павялічыць падаткі, сабраць больш у казну, але яны не з'яўляюцца нейкімі вызначальнымі для дзейнасці ІП. Ёсць фактары нашмат сур'ёзней.



— Як вы лічыце, да якіх наступстваў гэта прывядзе?

— Самае галоўнае наступства — сыход у цень. Частка іпэшнікаў закрыюць дзейнасць, частку перавядуць ва ўнітарныя прадпрыемствы.

А частка сыдзе ў цень: з чаго мы пачыналі 25 гадоў таму, да таго і прыйдзем. Людзі будуць працаваць па-шэраму, напляваўшы ў прынцыпе на падаткі.

— Як гэта паўплывае на жыццё беларусаў?

— Тавараў будзе менш, яны будуць горшай якасці і даражэйшыя.

— Таксама ў законапраекце з 2023 года прапануецца адмена малаэфектыўных падатковых ільгот, але іх пералік не згадваецца.

— Не вельмі разумею, што маюць на ўвазе пад малаэфектыўнымі падатковымі льготамі. Былі сур'ёзныя льготы, якія рэальна функцыянавалі, але яны не адносяцца да малога бізнесу.

Напрыклад, ільгатаванне падатку на прыбытак на працягу першых сямі гадоў для малых гарадоў, менш падатковых праверак і гэтак далей. Трэба глядзець канкрэтныя пералікі. Таму што, можа, яны адным махам адменяць ільготы для малых гарадоў пад рубрыкай «малаэфектыўныя».

Паводле gazetaby.com

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: