Нацбанк: Прыкладна палова старых грошай ужо выведзена з абарачэння

Паводле дадзеных Нацыянальнага банка, прыкладна палова купюр старога ўзору выведзена з абарачэння ў Беларусі за два тыдні пасля дэнамінацыі.

"За 14 дзён ліпеня парадку 40–45% купюр намінальнага шэрагу 2000 года выведзена з абарачэння", — паведаміў у эфіры тэлеканала ОНТ начальнік галоўнага ўпраўлення наяўнага грашовага абарачэння Нацбанка Сяргей Гайко.
Да дэнамінацыі ў краіне хадзіла 600 млн. купюр старога ўзору. У Нацбанку мяркуюць, што ўжо да кастрычніка грашовыя знакі старога ўзору практычна выйдуць з абарачэння. Цалкам іх плануецца замяніць да канца года.

Нагадаем, 1 ліпеня ў Беларусі дэнамінаваная нацыянальная валюта. Маштаб памяншэння склаў 10.000. Гэта трэцяя дэнамінацыя рубля ў найноўшай гісторыі краіны.
Адрозненне цяперашняй дэнамінацыі ў тым, што разам з купюрамі ў абарачэнне ўведзены манеты. Усяго ў абарачэнне выпушчана сем наміналаў банкнот — 5, 10, 20, 50, 100, 200 і 500 рублёў, а таксама восем наміналаў манет — 1, 2, 5, 10, 20 і 50 капеек, 1 і 2 рублі.

Новыя і старыя грашовыя знакі будуць знаходзіцца ў Беларусі ў другім паўгоддзі ў паралельным абарачэнні.

Аляксей Арэшка, БелаПАН