З рапса хлеба не спячэш. Чаму рэжым удвая павялічыў планы па закупцы збожжа

Аляксандр Лукашэнка любіць хваліцца дасягненнямі беларускай сельскай гаспадаркі, дзякуючы якой, маўляў, мы можам і самі пракарміцца, і яшчэ не даць памерці ад голаду галадаючым заходнікам. Насамрэч, вядома, гэта хлусня. Захаваўшы з савецкіх часоў калгасы, дыктатар асудзіў айчынны сельгас на паступовае занядбанне. Сёлета будзе прайграна чарговая «бітва за ўраджай».

Можна запісаць рапс у збожжавыя, але нельга з рапсу спячы хлеб, адзначае выданне «Plan B». У нядзелю міністр сельскай гаспадаркі Сяргей Барташ сказаў, што Беларусь удвая павялічыла планы па закупцы збожжа за мяжой. Мяркуючы па ўсім, ураджай гэтага года будзе ніжэйшы нават за песімістычныя прагнозы.

Яшчэ ў чэрвені ўлады казалі, што збіраюцца купіць толькі паўмільёна тон збожжа ў Расіі. Але пасля чэрвеньскай засухі здарыліся дажджы, і планы прыйшлося карэктаваць.

«Каравай будзе больш сціплым. Больш чым на мільён тон. Але стварыць падушку бяспекі ўсё ж такі неабходна. Таму мы плануем каля мільёна тон, і прэзідэнт гэта даручыў, закупіць звонку», — сказаў Барташ.

Міністр не ўдакладніў, у якіх краінах Беларусь збіраецца купляць дадатковыя паўмільёна тон. Хоць іншага выбару, акрамя Расіі, верагодна, няма. У Расіі ўраджай гэтага года чакаецца ніжэй леташняга, але ўсё роўна вышэй за сярэдні: 130-140 мільёнаў тон.

Свой экспартны патэнцыял расійскія ўлады ацанілі ў 55 мільёнаў. Знойдзецца чым падзяліцца з саюзнікам. Нават калі саюзніку спатрэбіцца зноў карэктаваць планы і купляць яшчэ больш збожжа.

Бітва за ўраджай, бессэнсоўная і бязлітасная

Па стане на нядзелю ў Беларусі ўбралі ўраджай на 94 працэнтах палёў і сабралі 5,9 мільёнаў тон збожжа. Улічваючы, што на палях, якія прыбіраюць апошнімі, ураджайнасць заканамерна падае, больш за 6,0-6,2 мільёнаў тон сёлета сабраць не атрымаецца.

Пры гэтым летась, паводле звестак таго ж Мінсельгасхарча, Беларусь сабрала 8,6 мільёна тон збожжа. Гэта значыць дэфіцыт атрымліваецца не мільён тон, пра які казаў міністр, а два – два з паловай мільёны.

Але ў Мінсельгасхарча альтэрнатыўная арыфметыка. Разам з альтэрнатыўнай батанікай. Міністэрства ўпарта прылічвае да збожжа яшчэ і рапс. Хоць паводле ўсіх законаў, боскіх і дарвінаўскіх, рапс адносіцца да сямейства крыжакветных. Адпаведна, мае роднасныя сувязі з капустай, а не пшаніцай. Але з рапсам справаздачы атрымліваюцца, вядома, больш сімпотнымі. Калі лічыць разам з рапсам, то збожжа ў краіне ўжо зараз сабралі амаль сем мільёнаў тон. Ёсць, праўда, маленькая праблема. Лічыць рапс збожжам атрымліваецца, а хлеб з яго пячы — не вельмі.