Зноў «дзірка». Санкцыі ЕС не закрануць доўгатэрміновыя экспартныя кантракты на пастаўку калію

Новы, пяты пакет санкцый Еўрасаюза ў дачыненні да рэжыму Лукашэнкі пакіне беларускім уладам магчымасць экспартаваць калійныя ўгнаенні праз Літву.

Пра гэтае выключэнне паведаміў кіраўнік Мінабароны Літвы Арвідас Анушаўскас, выказаўшыся пры гэтым супраць падобнай практыкі, паведамляе АФН.

«Калі мы хочам, каб санкцыі былі эфектыўнымі, яны павінны быць усеабдымнымі і не прадугледжваць выключэнняў», — заявіў Анушаўскас.

Па словах міністра, у падрыхтаваным пакеце такія выключэнні ёсць па доўгатэрміновых кантрактах з ААТ «Беларуськалій».

Пастанова аб пятым пакеце санкцый супраць рэжыму Лукашэнкі будзе апублікаваная ў чацвер у афіцыйным часопісе ЕС.