4 гады калоніі за супраціў пры затрыманні. Суд вырашыў, што пратэстовец траўмаваў начальніка Савецкага РУУС
Начальнік РУУС Каліннік мяркуе, што Кочур нанёс яму ўдар. Астатнія пацярпелыя міліцыянты гэтага не бачылі. Зрэшты, суддзя палічыла віну падсуднага цалкам даказанай.
У судзе Заводскага раёна Мінска 19 сакавіка абвясцілі прысуд 23-гадоваму інжынеру Мікіту Кочуру, абвінавачанаму па ч. 2 арт. 363 Крымінальнага кодэкса («Супраціў супрацоўніку міліцыі пры выкананні, спалучанае з прымяненнем гвалту»).
Суддзя Анжэла Касцюкевіч прызнала Кочура вінаватым і прысудзіла яму 4 гады пазбаўлення волі з адбываннем пакарання ў калоніі агульнага рэжыму. Напярэдадні пракурор Вольга Дзіндзілевіч запрасіла для яго менавіта такое пакаранне. «Вясна» з дапамогай валанцёраў вяла маніторынг гэтага судовага працэсу, расказваем яго падрабязнасці.
У чым абвінавацілі Мікіту Кочура?
Увечары 11 жніўня, калі ў Мінску праходзілі акцыі пратэсту супраць вынікаў прэзідэнцкіх выбараў, Мікіта Кочур сустрэўся з братам і яго жонкай на вуліцы Някрасава, каб паказаць нядаўна набыты матацыкл. Брат Кочура з жонкай і дзецьмі прыехалі на машыне, прыпаркавалі яе побач. Двое дзяцей засталіся сядзець у машыне, а дарослыя размаўлялі побач каля матацыкла. Затым да іх пад'ехала міліцыя, супрацоўнікі ДАІ падышлі да Кочура і сталі патрабаваць у яго дакументы. Кочур, у сваю чаргу, папрасіў супрацоўнікаў прадставіцца і паказаць службовыя пасведчанні. У выніку Мікіту сцягнулі з матацыкла, павалілі на зямлю, збілі дубінкамі і затым павезлі ў РУУС.
Пазней на Мікіту Кочура завялі крымінальную справу па ч.2 арт. 363 Крымінальнага кодэкса («Супраціў супрацоўнікам міліцыі пры выкананні, спалучаны з прымяненнем гвалту»). 20 лістапада яго ўзялі пад варту. Пацярпелымі па крымінальнай справе былі прызнаныя начальнік УУС Савецкага раёна Сяргей Каліннік, старшы інспектар ДАІ Савецкага раёна Яўген Крыварот, супрацоўнікі міліцыі Невяровіч і Надзёжны.
Згодна з абвінавачаннем, па патрабаванні супрацоўнікаў міліцыі Кочур адмовіўся прад'явіць дакументы і падаць да агляду транспартны сродак (матацыкл «Хонда»), таксама адмовіўся прайсці ў Савецкае РУУС для высвятлення асобы. Замест гэтага ён аказаў супраціў супрацоўнікам міліцыі — штурхаў і наносіў удары, парваў аднаму з іх кашулю. А палкоўнік Сяргей Каліннік упаў ад штуршка Качура і атрымаў траўму локця.
Мікіта Кочур сваёй віны ў злачынстве не прызнаў.
Што адбылося ўвечары 11 жніўня? Версіі пацярпелых
Супрацоўнікі ДАІ Крыварот, Невяровіч, а таксама начальнік ДАІ Савецкага раёна Шармалайкін у той вечар патрулявалі тэрыторыю, звяртаючы асаблівую ўвагу на матацыклістаў. У судзе яны распавялі, што падчас інструктажу кіраўніцтва завастрала ўвагу на тым, што матацыклісты могуць каардынаваць пратэстны рух, перавозіць кактэйлі Молатава. На вуліцы Някрасава яны ўбачылі Кочура. Паводле слоў Невяровіча, іншы матацыкліст, які праязджаў міма, павітаў кампанію знакам V, а Кочур адказаў тым жа. Тады супрацоўнікі ДАІ каля пяці хвілін паназіралі за ім і вырашылі падысці, праверыць дакументы і рэчы на прадмет «датычнасці да пратэстаў». Яны адразу ж выклікалі падмацаванне — і прыехаў Сяргей Каліннік, які патруляваў вуліцу непадалёк. Пры гэтым на судзе ніхто не змог патлумачыць, навошта першапачаткова трэба было выклікаць яшчэ адзін патруль.
Паводле слоў пацярпелых, яны падышлі да Кочура і ветліва папрасілі прад'явіць дакументы. Пасля адмовы Мікіты падпарадкавацца, Крыварот і Невяровіч папярэдзілі пра магчымае ўжыванне фізічнай сілы, узялі яго за рукі, спрабуючы сцягнуць з матацыкла. У адказ Кочур пачаў іх збіваць, рваць на іх вопратку і нават душыць.
На пытанне адваката, чаму яны не прадставіліся, адказалі, што асцерагаліся за жыццё і здароўе, бо Кочур быў агрэсіўна настроены і патрабаваў паказаць службовае пасведчанне.
Паводле версіі Крыварота, Кочур пачаў іх штурхаць, біць, душыць яго каўняром форменнай кашулі (у выніку чаго адарваў два гузікі) ці ледзь не адразу, як толькі яны да яго падышлі.
Паводле версіі Невяровіча, Кочур злез з матацыкла і ўжо потым пачаў супраціўляцца. Нібыта спрабаваў адштурхнуць яго руку (у другой была гумовая палка), спрабаваў схапіць за бронекамізэльку. Далей Невяровіч ў затрыманні не ўдзельнічаў.
У варыянце пацярпелага Надзёжнага, Кочура ўзялі пад рукі, правялі пару метраў, і тут ён пачаў супраціўляцца, з-за чаго ў Надзёжнага з галавы зляцеў шлем.
Пацярпелыя былі аднадушныя ў двух момантах: ніхто не бачыў, каб Кочур біў начальніка Савецкага РУУС Калінніка і каб той падаў. У паказаннях усіх пацярпелых было шмат супярэчнасцей з пратаколамі, складзенымі раней. Ні адзін з іх не пісаў на Кочура рапарт.
Начальнік РУУС Каліннік мяркуе, што Кочур нанёс яму ўдар. Астатнія пацярпелыя гэтага не бачылі
Галоўны пацярпелы — начальнік УУС Савецкага раёна Сяргей Каліннік — падчас допыту распавёў, што, калі Кочур адмовіўся прайсці ў аўтамабіль ДАІ для далейшага разбіральніцтва, побач сталі збірацца грамадзяне. Ацаніўшы колькасць людзей і супрацоўнікаў, Каліннік разумеў, што «колькасная перавага на баку грамадзян і супрацоўнікі ў гэтым выпадку не змогуць выконваць свае абавязкі». Таму мэта супрацоўнікаў была «максімальна неканфліктна змясціць Кочура ў службовы аўтамабіль і даставіць у РУУС».
Сяргей Каліннік, фота «Минск-Новости»
Паволе слоў Калінніка, Крыварот і Невяровіч з двух бакоў за рукі падхапілі Кочура і спрабавалі зняць з матацыкла. Кочур быў агрэсіўны, затым былі штуршкі, спробы вырвацца. Затым завязалася бойка. Каліннік вырашыў адціснуць Кочура ад аўтамабіля ДАІ, таму што той «кідаў супрацоўнікаў на кузаў аўто». У працэсе затрымання Кочура Каліннік упаў. Паводле яго слоў, ён упаў ад болевага шоку (балела левая рука, локаць), адключыўся секунд на 40 і не бачыў, як скруцілі Кочура. Але мяркуе, што яго па локці ўдарыў Кочур.
Каліннік ацаніў свае маральныя і фізічныя пакуты ў 7 500 бел. рублёў. Астатнія пацярпелыя не заяўлялі пазовы на пакрыццё шкоды. Пры гэтым ніхто з астатніх пацярпелых не бачыў, каб Кочур біў Калінніка.
Пагражалі разбіць тэлефон, калі будзе здымаць затрыманне. Што казалі сведкі?
Сведкамі на працэсе выступілі супрацоўнік Дэпартамента аховы Казмярчук, супрацоўнік патрульна-паставой службы Ян Барысаў, а таксама брат Мікіты Кочура Максім і яго жонка Алена, якія знаходзіліся на месцы затрымання.
Казмярчук адзначыў, што паміж Каліннікам і Кочурам у момант падзення Калінніка была адлегласць 2 метры, і перад гэтым Каліннік замахваўся нагой. Такім чынам гэта выключае тое, што ўдарыў Калінніка менавіта Кочур. На што Каліннік адказаў, што Казмірчук памыляецца: замаху нагі не было, а было паскарэнне, а таксама Каліннік выключае, што траўму яму мог нанесці хтосьці з супрацоўнікаў, бо яны знаходзіліся або за спінай Кочура, або па баках, у тым ліку ён выключае, што траўму мог атрымаць ад дубінкі.
Сведка Ян Барысаў, супрацоўнік ППС, казаў, што прыбыў на месца здарэння ўжо пасля таго, як адбылося затрыманне, бачыў Кочура, які ўжо ляжаў на зямлі. Кочура пасадзілі ў машыну ППС для дастаўкі ў РУУС Савецкага раёна. З Кочурам гутарак не вёў і не памятае, каб той скардзіўся або прасіў выклікаць «хуткую». Калінніка на месцы здарэння бачыў, аднак не бачыў, як той атрымаў траўму, і даведаўся пра траўму «з чутак».
Сведкі Максім і Алена Кочуры разам з дзецьмі вярталіся з дачы, па дарозе сустрэліся з Мікітам каля іх дома на паркоўцы. Мікіта сядзеў на матацыкле з заглушаным рухавіком. Дарослыя размаўлялі паміж сабой, дзеці і сабака засталіся ў машыне. У машыне працаваў відэарэгістратар.
Кочуры заўважылі, што недалёка ад іх спыніўся аўтамабіль ДАІ, аднак значэння гэтаму не надалі. Праз пяць хвілін ДАІ, чорны форд і аўтамабіль ТДА пад'ехалі да Кочураў. Адзін з аўтамабіляў прыпаркаваўся так, што заблакаваў выезд машыне брата Кочура. Да Алены Кочур падышоў супрацоўнік, з якім яна спрабавала весці дыялог, хацела даведацца, што адбываецца, і спрабавала растлумачыць, што яны жывуць непадалёк, прыехалі дадому і размаўляюць з братам, спрабавала паказаць пашпарт, усё гэта супрацоўнік праігнараваў. Калі пачалося затрыманне Мікіты Кочура, Алена хацела зняць гэта на відэа, аднак супрацоўнік сказаў, што разаб'е яе тэлефон, калі яна будзе здымаць.
Сведкі так апісалі момант затрымання. Да Мікіты падышлі супрацоўнікі, ніхто не прадставіўся і не прад'явіў дакументы. Мікіта некалькі разоў прасіў гэта зрабіць. Супрацоўнікі просьбу праігнаравалі і сталі сцягваць Мікіту з матацыкла. У гэты момант дзеці ў машыне сталі плакаць, і Алена пайшла іх супакойваць. Сваякі бачылі, што ў момант затрымання Мікіту білі дубінкай у вобласці таза, сцёгнаў і спіны. На пытанні родных і самога Кочура пра прычыну затрымання і пра тое, куды яго павязуць, ніхто з супрацоўнікаў не адказваў. Паводле слоў сваякоў, Мікіта не мог выконваць актыўных рухаў, бо з усіх бакоў на ім фактычна віселі трое чалавек.
Пасля даследавання матэрыялаў справы пракурор Вольга Дзіндзілевіч запрасіла для Кочура чатыры гады калоніі, лічачы яго віну цалкам даказанай. Суддзя Анжэла Касцюкевіч вынесла менавіта такое рашэнне. Таксама паводле рашэння суда Кочур павінен выплаціць пацярпеламу Калінніку 7500 рублёў кампенсацыі, а таксама пакрыць працэсуальныя выдаткі.