50 журналісцкіх саюзаў Еўропы патрабуюць вызвалення беларускіх калег і заклікаюць узмацніць ціск на ўлады Беларусі

Грамадства

Кіраўнікі 50 журналісцкіх саюзаў і аб'яднанняў у 33 еўрапейскіх краінах сёння заклікалі свае ўрады ўзмацніць ціск і прыняць меры ў сувязі з пастаяннымі парушэннямі правоў чалавека і свабоды прэсы ў Беларусі.

snimok_0.png


У сумесным лісце яны заклікаюць кіраўнікоў урадаў сваіх краін запатрабаваць ад Беларусі неадкладнага вызвалення 12 зняволеных журналістаў і спынення адміністрацыйнага і крымінальнага пераследу беларускіх калег, піша БАЖ.

Па ініцыятыве Еўрапейскай федэрацыі журналістаў, сябрам якой з’яўляецца Беларуская асацыяцыя журналістаў, кіраўнікі 50 журналісцкіх арганізацый у 33 краінах Еўропы сёння, 25 сакавіка, накіравалі сумесны ліст кіраўнікам і ўрадам еўрапейскіх дзяржаў пра сітуацыю ў Беларусі.

Падпісанты ліста 50 журналісцкіх саюзаў выказваюць глыбокую заклапочанасць у сувязі з узмацненнем рэпрэсій у Беларусі. На сённяшні дзень у краіне больш за 250 палітвязняў, у тым ліку 12 журналістаў. І гэта толькі вяршыня айсберга. З 9 жніўня 2020 года было затрымана больш за 30 000 чалавек (у тым ліку больш за 480 журналістаў), прычым многія з іх сталі ахвярамі гвалту і катаванняў.

На дадзены момант ў няволі застаюцца журналісты:

  • Кацярына Андрэева
  • Дар'я Чульцова
  • Кацярына Барысевіч
  • Юлія Слуцкая
  • Ала Шарко
  • Сяргей Альшэўскі
  • Пётр Слуцкі
  • Ксенія Луцкіна
  • Андрэй Аляксандраў
  • Дзяніс Івашын
  • Язэп Палубятка
  • Сяргей Гардзіевіч

У сумесным лісце кіраўнікі журналісцкіх саюзаў заклікаюць:

— патрабаваць ад улад Беларусі неадкладнага вызвалення 12 зняволеных журналістаў, адмены адміністрацыйных і крымінальных спраў супраць беларускіх журналістаў і аднаўлення працы «Прэс-клуба»;

— звярнуцца да Арганізацыі Аб’яднаных Нацый, АБСЕ, Савета Еўропы і Еўрапейскага Саюза, каб міжнародная супольнасць узмацніла ціск і прыняла меры з нагоды пастаянных парушэнняў правоў чалавека і свабоды прэсы ў Беларусі.

«Мы вітаем рашэнне Савета па правах чалавека ААН стварыць групу следчых для збору доказаў па празмерным ужыванні сілы і катаванняў з боку ўлад Беларусі, — заявіў прэзідэнт Еўрапейскай федэрацыі журналістаў Могенс Бліхер Б’еррэгард. — Але гэтага недастаткова. Рэпрэсіі працягваюцца і ўзмацняюцца. Рэжым Лукашэнкі павінен неадкладна вызваліць усіх палітвязняў, у тым ліку 12 журналістаў, якія толькі рабілі сваю працу. Надышоў час еўрапейскім урадам і міжнароднай супольнасці прыняць меры».