Ачомаліся. Сайт і сацсеткі «Новага Часу» прызнаны «экстрэмісцкімі»

Улады, нарэшце, перасталі адразаць котцы хвост па кавалках. Раней нашы сацсеткі прызнавалі «экстрэмісцкімі» па адной — спачатку Telegram, потым «Аднакласнікі», нядаўна — былы Твітар (цяпер X). А цяпер, як паведамляюць праваабаронцы, прызнаны «экстрэмісцкімі» адразу «сайт і сацсеткі выдання «Новы Час».

У кампаніі з намі прызнаны «экстрэмісцкімі» сацсеткі ксяндза Вячаслава Барка (Youtube-канал, Facebook-старонка і Telegram-канал святара). Адпаведнае рашэнне прынята судом Чыгуначнага раёна Віцебска 26 снежня.

Таксама «экстрэмісцкай» прызнана ініцыятыва «Асацыяцыя беларускага бізнесу за мяжой».

У нашу кампанію трапілі Telegram-каналы і чаты:

• Чат «Беларусы в Тбилиси»,
• «Забастовка. Школьники/Студенты/Преподаватели»,
• «СНАТ БЛАГОДІЙНИЙ ФОНД ХЕЛЕН МІНСЬКОЇ»,
• «Твои возможности»,
• «Маладая Грамада»,
• «Чечерск»;
• Старонка ў «Аднакласніках» «МИКАШЕВИЧИ И МЫ»;
• TikTok-старонкі «president.sveta», «belarus_sergej», «anti-communist», «annakanius», «lukashenko_yxadi», «honestpeopleby», «tokbelarus».

Варта зазначыць, што нас ужо даўно ўсе лічылі «экстрэмісцкімі» і вельмі здзіўляліся, калі мы казалі, што сайт яшчэ не быў уганараваны гэтым пачэсным званнем.

Цяпер улады выправілі гэты недахоп.

У сувязі з прызнаннем нашага сайта «экстрэмісцкім» нічога не зменіцца. Мы будзем працаваць па-ранейшаму. Адзначым, што ў законе няма забароны на «чытанне» экстрэмісцкіх матэрыялаў, адказнасць прадугледжана толькі за іх распаўсюджванне.

Такім чынам — будзьце больш уважлівыя да рэпостаў нашых матэрыялаў. Карыстайцеся VPN. Захоўвайце лічбавую гігіену.

І заставайцеся з намі.