Актывіст з Наваградку падае ў суд на міліцыянта, які сфабрыкаваў на яго справу

Апазіцыйны актывіст з Наваградку Вадзім Лявон быў асуджаны на сем сутак арышту нібыта за непадпарадкаванне міліцыі. Цяпер ён рыхтуе дакумэнты ў суд на міліцыянта, які напісаў на яго заяву аб сваім збіванні, і на сведкаў, якія давалі паказанні ў судзе супраць яго.

Перад 25 Сакавіка з Вадзімам Лявонам з Наваградку адбылася цэлая эпапэя затрымання міліцыяй. Ён распавядае, што яшчэ 22 сакавіка да яго ў вёску ў Наваградзкі раён прыехалі міліцыянты шукаць самагонку, бо, маўляў, паступіў сігнал.
— У мяне на працягу пяці гадоў, калі адбываюцца чарговыя мітынгі ці яшчэ нейкія палітычныя мерапрыемствы, прыяжджаюць шукаць самагонку. Але ніводнага разу мяне не прыцягвалі да адказнасці за тое, што я ганю самагонку і прадаю яе, бо ніколі не знайшлі ў мяне той самагонкі. Зрэшты, я яе проста не ганю. Аднак гэтым разам раённая газэта паведаміла, што мяне забралі ў міліцыю менавіта за тое, што я займаюся самагонаварэннем.
Лявон распавядае, што падчас ператрусу міліцыянты знайшлі ў яго цэлы архіў самых розных апазіцыйных выданняў, буклетаў, газетаў, іншай друкаванай законнай прадукцыі, якую ён збіраў з 2006-га па 2016 год. На ўсіх гэтых друкаваных выданнях былі выходныя звесткі.
— Гэта была друкаваная прадукцыя яшчэ з часоў выбараў Мілінкевіча, іншых выбараў і кампаніяў і да 2016 году. Я проста збіраў архіў, і там, як правіла, усіх гэтых папераў было па некалькі аднолькавых экзэмпляраў. Нешта проста заставалася пасля выбарчых ці іншых кампаніяў, рэфэрэндумаў, і я далучаў усе гэтыя паперы ў архіў. Дарэчы, міліцыянты загрузілі ёю цэлую «газэль». Яны калі гэта пабачылі, паехалі і выпісалі новую пастанову на мой арышт за нібыта распаўсюд незарэгістраванай друкаванай прадукцыі.
Паводле Лявона, у Наваградку ў пастарунку ягоную друкаваную прадукцыю разбіралі больш сямі гадзінаў. У спісе міліцыянтаў, паводле яго, налічвалася больш ста пунктаў, пад якімі былі запісаныя ягоныя архіўныя паперы.
— Так яны ўсяго цалкам пры мне і не пералічылі. Склалі пратакол за распаўсюд незарэгістраванай друкаванай прадукцыі і ў дзве гадзіны ночы адпусцілі. Я паехаў дадому, бо раніцай трэба было на працу.
А на наступны дзень, паводле Лявона, пачалося самае цікавае. Ужо ў абед 23 сакавіка да яго на працу зноў прыехалі міліцыянты і сказалі, што ён павінен ехаць з імі ў суд, паколькі на яго складзены пратакол за дробнае хуліганства.
— А ў судзе мяне здзівілі яшчэ больш, бо там абвінавацілі ў тым, што падчас майго знаходжання ў РАУС я пабіў міліцыянта, лаяўся там нецэнзурна і ўрэшце самавольна ўцёк з РАУСу ў дзве гадзіны ночы. Я быў у шоку, казаў суду, каб паказалі здымкі з відэакамераў, якія ёсць у РАУСе. Мне сказалі, што відэакамеры не з'яўляюцца доказамі, адмовіліся таксама запрасіць сведак, якія знаходзіліся ў міліцыі ў якасці панятых, бо гэта, маўляў, немэтазгодна. Праўда, у якасці сведак яны прадставілі двух чалавек, якіх у той вечар затрымалі за распаўсюд наркотыкаў і якія тады таксама знаходзіліся ў РАУС. Супраць мяне сведчылі два наркаманы. Карацей, мне далі 4 сутак за тое, што пабіў міліцыянта і ўцёк, і 3 сутак — за непавагу да суду, бо, маўляў, не з'явіўся на працэс, а недзе хаваўся. Хоць міліцыя мяне забрала проста на працы.
Гісторыя на гэтым не сканчаецца, паколькі на наступны дзень у Наваградак прыехаў сябар Лявона Вадзім Бабін і прывёз яму ў вязніцу перадачу. Ужо калі ён хацеў вяртацца дадому, на вакзале яго затрымалі міліцыянты.
— На яго склалі пратакол за лаянку ў грамадскім месцы і таксама асудзілі. Мы адбывалі пакаранне ў Карэліцкім ІЧУ. Ставіліся да нас нармальна, праблемаў не было, адзінае, не давалі магчымасці патэлефанаваць дадому.
Пасля выхаду з вязніцы Лявон звярнуўся да юрыстаў «Вясны» і рыхтуе дакументы, каб падаць у суд на міліцыянта, які напісаў заяву на тое, што Лявон нібыта збіў яго ў пастарунку, а таксама на лжэсведкаў, якія давалі паказанні супраць яго ў судзе.
— Калі я дамагаўся ад міліцыянтаў адказу, за што супраць мяне сфальсіфікавалі справу, мне адказвалі: «Ты сам ведаеш, адкуль ногі растуць...»

Паводле svaboda.org