Алесь Бяляцкі адказаў на віншаванні жодзінцаў (фота)

Праваабаронцы ПЦ "Вясна" у Жодзіне, Святлана Лапіцкая і Аляксей Лапіцкі, разам з іншымі жодзінскімі актывістамі, якія павіншавалі Алеся Бяляцкага з Калядамі, Раством і Новым 2014 годам, атрымалі ад яго паштоўку і ліст. Карэспандэнцыя ішла да адрасатаў каля 8 дзён.



Алесь Бяляцкі аддзячыў сяброў за віншаванні ды з свайго боку павіншаваў кожнага з іх. Паміж іншым ён узгадвае, што засталося яму ўжо менш за палову тэрміну. Таму ён з большым аптымізмам глядзіць у будучыню, бо натуральна марыць пра дзень вызвалення. Алесь жартуе, што ён ужо як той беларус у сумнавядомым анекдоце — ужо амаль прыцярпеўся. Дадзены жарт завяршаецца малюнкам маленькай выявы чалавечага тварыку з усмешкі, які альбо выпадкова, альбо спецыяльна размясціўся адразу над перагорнутым дагары друкаваным надпісам з паштоўкі — "Свабода думкі. Артыкул 18. Усеагульная дэкларацыя Правоў Чалавека".

У капэрце Алесь Бяляцкі пераслаў у Жодзіна таксама адну з паштовак салiдарнасцi, якiя яму ў вялікай колькасці прысылаюць неабыякавыя людзі з Еўропы ды ўсяго свету, як напрыклад гэту з Бельгіі (гл. фота).

Алесь Лета, Беларускае Радыё Рацыя

Фота А.Лапіцкага