Амаль тысяча калегаў заступіліся за работніка БМЗ, які ўдзельнічаў у страйку, але яго ўсё адно звольнілі

Генеральны дырэктар сказаў, што не можа працягнуць завадчаніну кантракт, бо гэтым ён праявіць слабасць.

Учора прынята канчатковае кадравае рашэнне па работніку БМЗ Віталю Савельеву, якога судзілі за ўдзел у страйку на заводзе 17 жніўня. Нагадаем, падчас адбыцця тэрміну адміністрацыйнага арышту завадчаніну на працоўнае месца прыйшло паведамленне, што з ім не будзе працягнуты кантракт, тэрмін якога мінае 4 лістапада. Калектыў прадпрыемства быў абураны і сабраў амаль тысячу подпісаў пад хадайніцтвам, адрасаваным генеральнаму дырэктару БМЗ Дзмітрыю Корчыку.
«Паважаны Дзмітрый Аляксандравіч!
Мы, працаўнікі завода, лічым сваім абавязкам выказацца ў падтрымку і абарону нашага калегі слесара-рамонтніка 6 разраду Савельева В.В.
На заводзе Віталь Віктаравіч працуе ўжо больш за 20 гадоў, 18 з іх непасрэдна ў ЭСПЦ-1, дзе паспяхова выконвае свае абавязкі па цяперашні час. На працягу ўсяго часу працы ён не атрымаў ніводнага спагнання.
Рацыяналізатарская прапанова Савельева В.В. (Мантаж / дэмантаж цыліндру халадзільніка МНЛЗ-2) была высока ацэнена на заводзе і ўкаранёна ў вытворча-тэхналагічны працэс, што дапамагло зэканоміць значныя грашовыя сродкі.
Мы ведаем яго як прафесіянала сваёй справы і надзейнага таварыша. Яго ўзровень кваліфікацыі і ўменняў цалкам адпавядае займанай пасадзе.
Акрамя гэтага, Віталь Віктаравіч выхоўвае непаўналетняе дзіцяці-інваліда, а наша прадпрыемства, як сацыяльна-арыентаванае, не павінна пакінуць яго сам-насам са сваімі праблемамі.
Просім Вас, як вопытнага кіраўніка прадпрыемства, прыслухацца да нашага меркавання і працягнуць з Савельевым В.В. кантракт».
Тыдзень таму на прыёме ў генеральнага дырэктара Дзмітрый Корчык прызнаўся, што ўражаны колькасцю подпісаў у хадайніцтве і паабяцаў зрабіць усё, што ад яго залежыць: пагутарыць асабіста з начальнікам Савельева, з калектывам, высветліць, ці сапраўды ён такі добры спецыяліст.
Учора адбылася вырашальная асабістая сустрэча Віталя з Дзмітрый Корчыкам, на якой у ходзе гадзіннай гутаркі генеральны дырэктар сказаў, што не можа працягнуць завадчаніну кантракт, бо гэтым ён праявіць слабасць.
— Пайсці насустрач людзям — гэта слабасць ?! Гэта называецца чалавечнасцю, Дзмітрый Аляксандравіч! — кажуць падпiсанты хадайніцтва. — Мы Вас прасілі, Вы нас не пачулі. Затое ўбачыце. Хутка. Вельмі хутка!
gomel.today