БелАЭС завяршае абкатку абсталявання і рыхтуецца да завозу ядзернага паліва
Этап гарачай абкаткі абсталявання першага энергаблока будучай Беларускай АЭС павінен быць завершаны ў сакавіку, паведаміў журналістам 4 сакавіка ў Мінску намеснік міністра энергетыкі Міхаіл Міхадзюк.
«Я ўжо неаднаразова гаварыў, што мы [ядзернае] паліва завязем да таго моманту, калі будзем гатовыя да фізічнага пуску, — сказаў чыноўнік. — У гэтым месяцы павінны завяршыць этап гарачай абкаткі. Далей ідзе тэхналагічны рэгламент па рэвізіі ўсяго абсталявання, якое прайшло гарачую абкатку, і ідзем на фізічны пуск».
17 лютага дэпартамент па ядзернай і радыяцыйнай бяспецы МНС (Дзяржатамнагляд) прыступіў да мэтавай праверкі гатоўнасці БелАЭС да завозу ядзернага паліва. Праверка можа праводзіцца на працягу 30 дзён. Калі яе вынікі будуць станоўчымі, спецыялісты АЭС змогуць перайсці да дастаўкі паліва, яго размяшчэння ў сховішча і пачаць падрыхтоўку да наступных этапаў уводу ў эксплуатацыю першага энергаблока станцыі.
У рамках праверкі спецыяльная рабочая група Дзяржатамнагляду ацэньвае ў тым ліку прынятыя адміністрацыяй АЭС арганізацыйныя і тэхнічныя меры на адпаведнасць патрабаванням нарматыўных актаў у галіне забеспячэння ядзернай і радыяцыйнай бяспекі. Таксама ацэньваецца, ці дастаткова прынятых мер для абыходжання з ядзерным палівам.
На прэс-канферэнцыі 19 снежня 2019 года Міхаіл Міхадзюк заявіў, што даставіць паліва на БелАЭС плануецца ў першым квартале 2020 года. Ён не выключыў, што ў гэты ж перыяд адбудзецца фізічны пуск першага энергаблока — этап запуску, падчас якога ў ядзерны рэактар загружаецца паліва.
Міністр энергетыкі Віктар Каранкевіч перад выніковай калегіяй міністэрства 13 лютага гэтага года заявіў журналістам, што фізічны і энергетычны пуск першага энергаблока АЭС запланаваны на 2020 год. Часовыя рамкі пераходу да гэтых этапаў запуску станцыі ён не назваў.
Беларуская АЭС узводзіцца паблізу Астраўца (Гродзенская вобласць) за кошт крэдыту Расіі па тыпавым расійскім праекце ВВЭР-1200. Паводле апошніх заяваў чыноўнікаў, увод у эксплуатацыю першага энергаблока АЭС запланаваны на 2020 год, другога — на 2021-й. Згодна з прагнозам Міністэрства энергетыкі, пасля выхаду на поўную магутнасць станцыя будзе выпрацоўваць больш за 19 млрд кВт · г электраэнергіі штогод.
Паводле naviny.by