Беларусь дашле гуманітарную дапамогу Зімбабвэ і Мазамбіку на 312 тысяч долараў

Самалёт з грузам беларускай гуманітарнай дапамогі афрыканскім краінам рыхтуецца да вылету, паведаміла Радыё Свабода са спасылкай на Міністэрства надзвычайных сітуацый 16 красавіка.

Месяцам раней на ўсходняе ўзбярэжжа Афрыкі абрынуўся цыклон «Ідай». Залевы і вецер з парывамі да 177 км/г прынеслі значныя разбурэнні, загінула да тысячы чалавек. Па гуманітарную дапамогу звярнуліся 65 тысяч жыхароў, больш за паўмільёна засталіся без жытла і харчоў.
Пасля ўзгаднення з Аляксандрам Лукашэнкам і паводле пастановы Савету Міністраў Беларусь высылае ў Мазамбік і Зімбабвэ цукар, муку, тушаніну, дзіцячыя кансервы, мыла, коўдры, пральны парашок, адзенне і абутак, школьныя сшыткі і сталовыя прыборы на агульную суму 656 421 рубель і 53 капейкі.
Калі дакладна адбудзецца вылет, не паведамляецца. Але МНС публікуе фота загрузкі самалёта гуманітарнай дапамогай. Супрацоўнікі МНС маюць суправаджаць груз і разгружаць самалёт па прылёце.