Беларуская чыгунка абвясціла аб канчатковым аднаўленні працы сваёй электроннай сістэмы

Беларуская чыгунка заявіла, што цалкам аднавіла працу сваёй электроннай сістэмы. Пра яе збой стала вядома 24 студзеня. Адказнасць за яго ўзялі на сябе хакеры-партызаны, нагадвае «Еўрарадыё».

26 студзеня Беларуская чыгунка здолела часткова ліквідаваць наступствы хакерскай атакі (афіцыйна пра яе не згадваюць). Стала магчымым купіць анлайн квіткі на цягнікі з нумераванымі месцамі. А вось пра аднаўленне магчымасці набыцця квіткоў на цягнікі з ненумераванымі месцамі паведамілі толькі 3 лютага.

Хакеры-партызаны заяўлялі, што спрабавалі стварыць перашкоды ў дастаўцы ў нашу краіну расійскіх войскаў. Яны патрабавалі вызваліць 50 беларускіх палітвязняў ды спыніць фармаванне ў Беларусі групоўкі войск РФ.