Брэсцкія медыкі адмаўляюцца рабіць прышчэпкі расійскай вакцынай ад каронавіруса

Па словах лекараў, вакцынуюцца пакуль адзінкі.

У Брэсце медыцынскіх работнікаў, якіх аднеслі да групы рызыкі, пачалі вакцынаваць ад COVID-19 у сярэдзіне студзеня. Аднак сам працэс пакуль ідзе не вельмі актыўна. Як распавяла супрацоўніца адной з дзіцячых паліклінік горада, прышчапляцца расійскай вакцынай «Спутник V» нікога не прымушаюць, але ў іх медыцынскай установе рабіць гэта добраахвотна жадаючых зусім не шмат.

- У нашай паліклініцы з дваццаці чалавек прышчэпку зрабілі толькі загадчыца і старэйшая медсястра. Пра пабочныя эфекты ад вакцыны дакладна не скажу, але, падобна, у старэйшай медсёстры яны былі, — кажа суразмоўца «Першага рэгіёна».

Кіраўніцтва паліклінікі аб прычынах адмоваў ад вакцынавання медыцынскі персанал не распытвае, але ў прыватных размовах лекары і медсёстры крытычна выказваюцца пра «Спутник V», сумняваючыся ў высокай эфектыўнасці расійскай вакцыны.

Адзначым, што два тыдні таму ў сацсетках распаўсюдзілася паведамленне, аўтар якога сцвярджаў, што медыкаў у Жабінцы забудоўваюць вакцынавацца ад каронавіруса. Нібыта ад уколу вызваляюцца толькі тыя, у каго афіцыйна быў дыягназ «каронавірусная інфекцыя». Мы звязаліся з аўтарам гэтага паведамлення і высветлілі, што гэта чуткі, канкрэтных фактаў прымусу да прышчэпкі няма. У самой бальніцы сітуацыю каментаваць не сталі.

Да таго ж некаторыя медыкі ўжо паспелі перахварэць каронавірусам і здалі тэст на антыцелы. Таму ў цяперашняй сітуацыі рабіць прышчэпку гэтыя супрацоўнікі паліклінікі палічылі немэтазгодным.

Што тычыцца ўмоў для захоўвання вакцыны «Спутник V», то з гэтым праблем не ўзнікае: ва ўстановах аховы здароўя ў Брэсце ёсць неабходнае маразільнае абсталяванне, якое дазваляе выконваць патрэбны тэмпературны рэжым.

Нагадаем, тэмпература захоўвання вакцыны — 18 градусаў ніжэй за нуль. Хоць у большасці вакцын ад іншых хвароб — 2-3 градуса цяпла. Пачатак масавай вакцынацыі насельніцтва намечана на вясну. Мяркуецца, што прышчэпку можа атрымаць любы жадаючы бясплатна.

Як паведамлялася афіцыйна, у Брэсцкую вобласць было завезена 3460 доз расійскай вакцыны. А па стане на 26 студзеня прышчэпкі зрабілі 785 работнікаў аховы здароўя — па ўсёй вобласці.