Былая журналістка БТ: «Мужа забралі. Кватэра перавернутая. Гарлапаняць, што мы здраднікі Радзімы»

Са здымнай кватэры супрацоўнікі ГУБАЗіК забралі былога супрацоўніка Белтэлерадыёкампаніі Дзмітрыя Бойку. Пра гэта ў Facebook паведаміла ягоная жонка Таццяна Бойка, таксама былая супрацоўніца БТ.

— У нас у кватэры ГУБАЗіК. Як добра, што дзеці ў садзе, — напісала Таццяна Бойка.

Пазней дадала: «Мужа забралі. Кватэра перавернутая. Буду займацца ўборкай. Страху няма. Лютасць. Жыве Беларусь», — напісала Таццяна.

Яшчэ пазней яна напісала: «Гарлапаняць, што мы здраднікі Радзімы».

Дзмітрый Бойка працаваў на тэлеканале «Беларусь 5» адказным за выпускі ў эфірным аддзеле на працягу апошніх сямі гадоў.

У верасні з-за сваёй грамадзянскай пазіцыі ён звольніўся з Белтэлерадыёкампаніі.

Яго жонка Таццяна, журналістка, рэжысёр, драматург і сцэнарыст тэлепраектаў звольнілася раней.

Мяркуючы па пастах у сацсетках, муж і жонка актыўна адстойвалі сваю грамадзянскую пазіцыю.

Паводле «Салідарнасці».