Былога ідэолага БелТА асудзілі да пяці гадоў калоніі за «злівы» тэлеграм-каналам

У судзе Савецкага раёна Мінска яшчэ 10 студзеня да пяці гадоў калоніі за перавышэнне службовых паўнамоцтваў (ч. 2 арт. 426 Крымінальнага кодэкса) асудзілі нядаўняга намесніка генеральнага дырэктара БелТА па ідэалагічнай працы Сяргея Адзярыху. Прысуд вынес суддзя Аляксандр Волк, паведамляюць праваабаронцы.

Роўна два гады таму ў гэты дзень былога чыноўніка асабіста ўзнагароджваў Лукашэнка за «высокі прафесіяналізм і значны асабісты ўнёсак у развіццё дзяржаўнай інфармацыйнай палітыкі». Цяпер Адзярыха асуджаны за перадачу прадстаўніку «Н@У» і ТГ-каналу «Н@к і М@йк» службовай інфармацыі, якая знаходзілася ў ягоным распараджэнні. Матыў — нібыта «пазбяганне люстрацыі пасля змены ўлады».