Дачка палітолага Касцюговай: Мама знайшлася на Акрэсціна, бацьку не забралі

Наста Касцюгова паведаміла на сваёй старонцы ў Фэйсбуку, што яе маці, палітолаг Валерыя Касцюгова знаходзіцца ў турме на Акрэсціна.

Паводле дачкі, «ні яе статус, ні абвінавачанне пакуль невядомыя». «Бацьку не забралі», — дадае Настасся.​

Першым пра затрыманне Касцюговай 30 чэрвеня паведаміў у сваім тэлеграм-канале палітолаг, кіраўнік варшаўскага Цэнтра палітычнага аналізу і прагнозу Павел Усаў. Інфармацыю пацвердзіла «Свабодзе» дачка Валерыі Наста. Пазней яна паведаміла, што пасля ператрусу маці павезлі ў Следчы камітэт.

Валерыя Касцюгова — вядомы беларускі палітолаг, рэдактарка сайта «Наше мнение», галоўная рэдактарка зборніка «Белорусский ежегодник».

Павал Вусаў і Наста Касцюгова лічаць, што пачаўся ціск на аналітыкаў. У гэтым рэчышчы яны разглядаюць і ўчарашняе затрыманне незалежнай эксперткі ў галіне дзяржкіравання Таццяны Кузінай.