Двух беларусаў затрымалі на польска-нямецкай мяжы за перавозку мігрантаў

32-гадовага грамадзяніна Беларусі затрымалі ў горадзе Любань на польска-нямецкай мяжы. Беларус вёз на аўтамабілі трох грамадзян Емена.

7_212594.jpg

Польскія памежнікі высветлілі, што йеменцы ў другой палове красавіка прыляцелі з Егіпта ў Расію па расійскіх візах і адправіліся ў Беларусь па інструкцыі правадыра, які звязваўся з імі праз WhatsApp. Па яго ўказанням яны нелегальна перайшлі беларуска-польскую мяжу 2 траўня. На тэрыторыі Польшчы ва ўмоўленым месцы іх сустрэў кіроўца-беларус і павёз да нямецкай мяжы. Кіроўцe і мігрантаў затрымалі ў Любані (Ніжнесылескае ваяводства), паведамляе Памежная служба Польшчы.

Мігрантаў з Емена змясцілі ў ахоўны цэнтр для замежнікаў на тры месяцы. Беларус можа атрымаць да трох гадоў пазбаўлення волі за садзейнічанне нелегальнай міграцыі.

Яшчэ аднаго беларуса затрымалі на польска-нямецкай мяжы 3 траўня. 25-гадовы грамадзянін Беларусі і яго 24-гадовая сяброўка з Украіны везлі на машыне трох грамадзян Сірыі. У сірыйцаў былі расійскія візы, яны нелегальна перасеклі беларуска-польскую мяжу і не збіраліся звяртацца за міжнароднай абаронай у Польшчы. Устаноўлена, што беларус прыехаў у Польшчу 2 красавіка. Беларуса і ўкраінку арыштавалі за арганізацыю нелегальнага перасячэння мяжы.

Паводле reform.news.