Дзяўчаты з бел-чырвона-белымі парасонамі на вуліцах Вільні (фота)
Сёння, 7 траўня, на шпацыр з бел-чырвона-белымі парасонамі выйшлі беларускі Вільні.
Шпацыр прайшоў
пад антываенным лозунгам у падтрымку флэшмобу «Дзяўчаты супраць вайны» #я_гуляю_не_вайне! Яго абвясцілі беларускія дзяўчаты Адэсы, калі выйшлі на
шпацыр падчас вайны.
Шпацыр у Вільні адбыўся таксама і на знак салідарнасці з мінскімі дзяўчатамі, што ў вельмі небяспечных умовах выходзілі на вуліцы з бел-чырвона-белымі парасонамі.
Дзяўчаты, што гулялі па Вільні з бчб-парасонамі, адзначылі:
«Мы салідарныя з беларускім ды ўкраінскім змаганнем супраць цемры, што навісла над нашымі краінамі, і жадаем падтрымаць добрых нязломных людзей, якія цяпер знаходзяцца ў Беларусі пад прыгнётам дыктатуры і ва Украіне церпяць ад тэрору расійскіх акупантаў альбо хаваюцца ад маскальскіх бомбаў ды ракет.
Мы сэрцам поруч і верым у перамогу дабра, любові ды справядлівасці!
Нельга здавацца! Святло пераможа цемру!
Жыве Беларусь!
Слава Украіне!»
Легендарныя шпацыры дзяўчат з бчб-парасонамі распачаліся напрыканцы жніўня 2020 года ў Мінску і былі адной з формаў пратэсту супраць беззаконня ды гвалту.
Дзяўчаты з парасонамі на вуліцах горада натхнялі беларусаў на змаганне і дэманстравалі нязломнасць духу нават у цёмныя часы, калі махавік рэпрэсіяў ужо працаваў напоўніцу.