Галоўны рэдактар «Нашай Нівы» выйшаў на волю, але застаецца ў статусе падазраванага
Ягор Марціновіч выйшаў на волю пасля трох сутак утрымання пад вартай. Сустракаць яго на Акрэсціна сабраліся блізкія і калегі. Усяго каля 20 чалавек.
Галоўны рэдактар выдання «Наша Ніва» паведаміў, што застаецца ў статусе падазраванага.
— У мяне сумленне максімальна чыстае, мне няма чаго баяцца, — кажа журналіст, каментуючы прэтэнзіі, што яму прад'яўляюцца.
Што тычыцца знаходжання на Акрэсціна, то, па словах Марціновіча, «умовы лепшыя, чым былі, ніякіх збіццяў няма».
Па словах Марціновіча, падчас знаходжання на Акрэсціна да яго прыязджаў прадстаўнік МУС. Акрамя пытанняў, якія тычацца узбуджанай крымінальнай справы, сілавіка цікавіла, чаму Марціновіч не жадае з'ехаць з краіны, як гэта зрабіла Святлана Ціханоўская.
— Ён прыязджаў у чацвер на Акрэсціна. Пасміхаўся, казаў, мы з вамі можам дамовіцца — вы скажаце, хто вам даў інфармацыю пра Барсукова і адразу адправіцеся дахаты ў якасці сведкі.
Ягор кажа, што пагроз не было, але прадстаўнік МУС увесь час пытаўся, колькі яму заплацілі за паклёп на Барсукова, хто дыджэям заплаціў за паклёп на Барсукова
У панядзелак Ягору Марціновічу трэба будзе з'явіцца ў суд, дзе будуць разглядаць яго адміністрацыйную справу за ўдзел у несанкцыянаванай масавай акцыі.
