Гомель: карыстальнікі сацсетак апазналі ў адным з налётчыкаў на кіроўцу легкавіка даішніка (відэа)

Сярод налётчыкаў, якія захапілі на вачах у супрацоўнікаў ДАІ кіроўцу Renault, карыстальнікі сацсетак апазналі старэйшага інспектара гомельскай ДАІ, маёра міліцыі Уладзіміра Кадэтава.

Пацярпелы ад самавольства міліцыі кіроўца Раман Сянько на прыёме ў праваабаронцы Леаніда Судаленкі распавёў, што пасля захопу і збіцця невядомымі адчуў сябе блага: ванітавала, кружылася галава, былі болі ў грудзях.
Ён звярнуўся ў бальніцу, медыкі дыягнаставалі ЧМТ, гематомы на руках і нагах, акрамя гэтага, у Рамана лопнула перапонка ў правым вуху. Ён ужо зрабіў аперацыю вушной ракавіны. Мужчына зняў пабоі, напісаў заявы ў Следчы камітэт, пракуратуру з патрабаваннем правесці праверку і прыцягнуць да адказнасці невядомых мужчын, якія збілі яго.
Нагадаем, 14 жніўня Раман Сянько ехаў па Савецкай вуліцы ў Гомелі. На плошчы Паўстання каля танка яго спыніў супрацоўнік ДАІ ў форме падпалкоўніка міліцыі.
"Як толькі я перадаў яму пасведчанне кіроўцы, той стаў крычаць у рацыю: "Пасведчанне 120, пасведчанне 120". Тут жа падляцеў шэры Opel, адтуль выбеглі мужчыны, адзін з іх ляпнуў мяне далонямі па вушах, затым рушылі ўслед ўдары ў грудзі і я апынуўся на асфальце, запіхнулі ў машыну і там білі кулакамі і дубінкамі. Адзін сеў зверху, біў і крычаў: "Пераменаў табе хочацца? Атрымлівай, б...я!"
Затым гамяльчаніна адвезлі ў Цэнтральны РАУС, дзе склалі два пратаколы: за стварэнне аварыйнай сітуацыі на дарозе і за непадпарадкаванне законным патрабаванням міліцыі. І адпусцілі.
Момант затрымання рамана трапіў на камеры смартфонаў мінакоў. Калі інфармацыя аб удзеле старэйшага інспектара Гомельскага ДАІ, маёра міліцыі Уладзіміра Кадэтава ў захопе і збіцці фактычна ні ў чым не вінаватага чалавека пацвердзіцца, яму, па ўсёй верагоднасці, прыйдзецца пакінуць службу ў органах правапарадку.

Гэта ўжо не першы выпадак удзелу маёра Кадетова у барацьбе з іншадумствам у нашай краіне. Раней ён патрабаваў прыцягнуць вядомага журналіста-фрылансера Кастуся Жукоўскага да адказнасці за паклёп. Журналіст назваў яго тады «пярэваратням у пагонах». Вядомыя таксама судовыя цяжбы блогера Паўла Пашына супраць маёра Кадэтава аб спагнанні 40 тыс $ маральнай шкоды.


Гомельская Вясна