Хронікі рэпрэсій. У Гродне затрымалі фатографа, на палітвязняў ціснуць

З дапамогай праваабаронцаў сабралі галоўнае пра палітычны пераслед у Беларусі 21 жніўня.

У Гродне на аўтафестывалі «Лакацыя» затрымалі фатографа Сяргея Марозава (на фота). Падрабязнасцяў пакуль няма.

Прызначана дата суда над палітзняволеным Ігарам Леднікам. Суд Ленінскага раёна Мінска пачне разгляд справы 2 верасня.

Мужчыну абвінавачваюць паводле ч. 2 арт. 367 КК (паклёп на Лукашэнку), палітвязню пагражае да шасці гадоў пазбаўлення волі.

Справу будзе разглядаць Таццяна Шоцік.

Нагадаем, Ігар Леднік — сябра БСДП з Барысава, быў затрыманы 18 красавіка гэтага года. Мужчына мае інваліднасць II групы праз праблемы з сэрцам. Вядома, што ў ліпені Ігару зрабілі аперацыю ў турэмнай бальніцы на страўнікава-кішачным тракце. Актывіст ідзе на папраўку.

Палітзняволены анархіст Дзмітрый Дубоўскі не выйшаў са штрафнога ізалятара пасля 20 сутак знаходжання ў ім. 

У ШІЗА Дубоўскага змясцілі ў яго дзень народзінаў, 29 ліпеня. За што менавіта былі вынесеныя спагнанні палітвязню, невядома.

Іншага анархіста, Яўгена Рубашку, асуджанага да пяці гадоў пазбаўлення волі, пазбавілі працяглага спаткання ў папраўчай калоніі №2. Пра гэта ён паведаміў у сваім лісце.

«Яшчэ сёння прайшоў сваю ініцыяцыю па пазбаўленні мяне чарговага доўгатэрміновага спаткання. Я і іншыя такія ж [палітычныя] атрымалі парушэнне за нібыта дрэнную ўборку яшчэ падчас каранціну. Думаю, вы самі пра ўсё гэта ведаеце. Усё як у людзей:)», — напісаў Яўген.

Усяго для зняволеных у калоніях ва ўмовах агульнага рэжыму прадугледжана тры працяглых і тры кароткатэрміновых спатканні ў год.